കോഴിക്കോട്: ആരോഗ്യ പ്രവർത്തകയ്ക്ക് നിരന്തരം ഫോണിൽ അശ്ലീല സന്ദേശങ്ങൾ അയച്ച് ശല്യം ചെയ്തെന്ന പരാതിയിൽ കോഴിക്കോട് പോലീസുകാരനെതിരെ കേസെടുത്തു. ജില്ലാ ക്രൈം റെക്കോർഡ്‌സ് ബ്യൂറോയിലെ ഉദ്യോഗസ്ഥനായ ഉണ്ണിക്കൃഷ്ണൻ ആണ് ആരോപണവിധേയൻ.(Case filed against Kozhikode policeman for harassing health worker over phone )
എരഞ്ഞിപ്പാലം സ്വദേശിയായ യുവതിയാണ് പോലീസിൽ പരാതി നൽകിയത്. നേരത്തെ പരിചയമുണ്ടായിരുന്ന യുവതിയെ ഈയിടെ വീണ്ടും ബന്ധപ്പെട്ട ഉദ്യോഗസ്ഥൻ ഫോൺ നമ്പർ കൈക്കലാക്കുകയായിരുന്നു. തുടർന്ന് പകലും രാത്രിയിലും ഉൾപ്പെടെ അസമയങ്ങളിൽ നിരന്തരമായി ഫോണിൽ വിളിച്ച് ശല്യം ചെയ്തെന്നും അശ്ലീല സന്ദേശങ്ങൾ അയച്ചെന്നുമാണ് പരാതി.
യുവതി നടക്കാവ് പോലീസിനെ സമീപിച്ചതിനെ തുടർന്ന് നടത്തിയ പ്രാഥമിക അന്വേഷണത്തിൽ പരാതിയിൽ കഴമ്പുണ്ടെന്ന് കണ്ടെത്തിയതിനെത്തുടർന്ന് പോലീസ് കേസ് രജിസ്റ്റർ ചെയ്യുകയായിരുന്നു. ആരോപണവിധേയനായ ഉദ്യോഗസ്ഥനെതിരെ നേരത്തെയും സമാനമായ പരാതികൾ ഉണ്ടായിരുന്നതായി സൂചനയുണ്ട്. നടക്കാവ് പോലീസ് കേസിൽ വിശദമായ അന്വേഷണം ആരംഭിച്ചിട്ടുണ്ട്. നിലവിൽ അറസ്റ്റ് ഉൾപ്പെടെയുള്ള നടപടികളിലേക്ക് പോലീസ് കടന്നിട്ടില്ല.