കൊല്ലം: തിരുവനന്തപുരം - ചെങ്കോട്ട മലയോര ഹൈവേയിൽ ഓടിക്കൊണ്ടിരുന്ന കാറിന് തീപിടിച്ചു. ഇന്ന് പുലർച്ചെ 5:45-ഓടെ കൊല്ലായിലിനും കലയപുരത്തിനും ഇടയിലായിരുന്നു അപകടം. തമിഴ്നാട് സ്വദേശികൾ സഞ്ചരിച്ചിരുന്ന സൈലോ കാറാണ് പൂർണ്ണമായും കത്തിനശിച്ചത്.(Car caught fire on highway, Five-member group barely escapes)
തിരുവനന്തപുരം വിമാനത്താവളത്തിൽ എത്തിയ തെങ്കാശി കടയനല്ലൂർ സ്വദേശി റമീസ് രാജയെയും കൂട്ടി നാട്ടിലേക്ക് മടങ്ങുകയായിരുന്നു അഞ്ചംഗ സംഘം. കൊല്ലായിൽ എത്തിയപ്പോൾ കാറിന്റെ ബോണറ്റിൽ നിന്ന് പുക ഉയരുന്നത് ഡ്രൈവറുടെ ശ്രദ്ധയിൽപ്പെട്ടു. ഉടൻ തന്നെ വാഹനം റോഡരികിൽ നിർത്തുകയും ഉള്ളിലുണ്ടായിരുന്നവർ പുറത്തിറങ്ങുകയും ചെയ്തു.
രണ്ട് കുട്ടികളടക്കം അഞ്ച് പേരാണ് വാഹനത്തിൽ ഉണ്ടായിരുന്നത്. എല്ലാവരും പരിക്കേൽക്കാതെ അത്ഭുതകരമായി രക്ഷപ്പെട്ടു. നിമിഷങ്ങൾക്കുള്ളിൽ തീ ആളിപ്പടരുകയും കാർ പൂർണ്ണമായും കത്തിയമരുകയും ചെയ്തു.
വിവരമറിഞ്ഞ് കടയ്ക്കലിൽ നിന്ന് അഗ്നിശമന സേന യൂണിറ്റ് സ്ഥലത്തെത്തിയാണ് തീയണച്ചത്. എഞ്ചിനിലെ ഷോർട്ട് സർക്യൂട്ടാണ് തീപിടുത്തത്തിന് കാരണമെന്നാണ് പ്രാഥമിക നിഗമനം. വിമാനത്താവളത്തിൽ നിന്ന് മടങ്ങുകയായിരുന്ന കുടുംബം തലനാരിഴയ്ക്കാണ് വലിയൊരു ദുരന്തത്തിൽ നിന്ന് രക്ഷപ്പെട്ടത്.