മലപ്പുറം : വീട്ടുമുറ്റത്ത് കാറിന് തീപിടിച്ച് ഗുരുതരമായി പൊള്ളലേറ്റ് ചികിത്സയിലായിരുന്ന യുവാവ് മരിച്ചു. തേഞ്ഞിപ്പലം ചെനക്കലങ്ങാടി പള്ളിപ്പടിക്ക് സമീപം പൊറോളി അബ്ദുള്ളയുടെ മകന്‍ ആദില്‍ ആരിഫ്ഖാന്‍ (29) ആണ് മരണപ്പെട്ടത്. ഒക്ടോബര്‍ 20-ന് അര്‍ധരാത്രിയോടെയായിരുന്നു അപകടം ഉണ്ടായത്.
വീടിന് സമീപം കാര്‍ നിര്‍ത്തി ആദില്‍ ഗെയ്റ്റ് തുറന്ന് വീണ്ടും കാര്‍ സ്റ്റാര്‍ട്ടാക്കി മുന്നോട്ടെടുത്തപ്പോഴാണ് തീപിടുത്തം ഉണ്ടായത്. വാതില്‍ തുറന്ന് പുറത്തിറങ്ങിയെങ്കിലും ആദിലിന് ഗുരുതരമായി പൊള്ളലേറ്റു. ഓടിക്കൂടിയ നാട്ടുകാരാണ് തീയണച്ചത്.
ഗുരുതരമായി പൊള്ളലേറ്റ ആദിലിനെ ആദ്യം കോഴിക്കോട് മെഡിക്കല്‍ കോളേജ് ആശുപത്രിയിലും പിന്നീട് കോഴിക്കോട്ടെ സ്വകാര്യ ആശുപത്രിയിലും പ്രവേശിപ്പിച്ചിരുന്നു. രണ്ടുദിവസം മുന്‍പ് വിദഗ്ധ ചികിത്സയ്ക്കായി ഡല്‍ഹി എയിംസ് ആശുപത്രിയിലേക്ക് മാറ്റിയെങ്കിലും ചൊവ്വാഴ്ച പുലര്‍ച്ചെ മരണം സംഭവിക്കുകയായിരുന്നു. വിദേശത്തേക്ക് തിരിച്ച് പോകാനിരിക്കുകയായിരുന്നു മരണം.