കാസർഗോഡ്: കേരളത്തിലെ സ്കൂളുകളിൽ മലയാളം ഒന്നാം ഭാഷയായി നിർബന്ധമാക്കുന്ന നിയമനിർമ്മാണത്തിനെതിരെ കർണാടക മുഖ്യമന്ത്രി സിദ്ധരാമയ്യ രംഗത്ത്. നിർദ്ദിഷ്ട ബിൽ ഭരണഘടനാപരമായ അവകാശങ്ങളുടെ ലംഘനമാണെന്നും കാസർഗോഡ് ഉൾപ്പെടെയുള്ള അതിർത്തി പ്രദേശങ്ങളിലെ കന്നഡ സംസാരിക്കുന്നവരുടെ താൽപ്പര്യങ്ങളെ ഇത് ദോഷകരമായി ബാധിക്കുമെന്നും അദ്ദേഹം ചൂണ്ടിക്കാട്ടി.(Bill should be withdrawn, Siddaramaiah writes to CM Pinarayi Vijayan)
ഒന്ന് മുതൽ പത്ത് വരെ ക്ലാസുകളിൽ മലയാളം നിർബന്ധമാക്കുമ്പോൾ കന്നഡ മാധ്യമ സ്കൂളുകളെ ഇത് പ്രതിസന്ധിയിലാക്കും. മാതൃഭാഷ പഠിക്കാനുള്ള കന്നഡികരുടെ അവകാശം ഇതിലൂടെ ഇല്ലാതാകുമെന്ന് അദ്ദേഹം എക്സിൽ (X) കുറിച്ചു. ഭാഷാ ന്യൂനപക്ഷങ്ങളുടെ അടിസ്ഥാന അവകാശങ്ങളെ ഹനിക്കുന്ന നടപടികൾ ഒരു കമ്മ്യൂണിസ്റ്റ് സർക്കാരിൽ നിന്ന് പ്രതീക്ഷിച്ചതല്ലെന്ന് അദ്ദേഹം വിമർശിച്ചു.
ബില്ലിൽ പുനർവിചിന്തനം വേണമെന്നാവശ്യപ്പെട്ട് കർണാടക അതിർത്തി പ്രദേശ വികസന അതോറിറ്റി കേരള ഗവർണർ രാജേന്ദ്ര വിശ്വനാഥ് ആർലേക്കർക്കും നിവേദനം നൽകിയിട്ടുണ്ട്. കാസർഗോഡ് ജില്ലയിലെ കന്നഡ ഭാഷാ ന്യൂനപക്ഷങ്ങളുടെ വിദ്യാഭ്യാസ-സാംസ്കാരിക തനിമ സംരക്ഷിക്കാൻ കേരള സർക്കാർ ഈ ബില്ലിൽ നിന്ന് പിന്മാറണമെന്നാണ് കർണാടകയുടെ ആവശ്യം.