കോഴിക്കോട് : പൂവാട്ടുപറമ്പില്‍ സ്വകാര്യബസ് ഇടിച്ച് ബൈക്ക് യാത്രക്കാരൻ മരിച്ചു. കായലം സ്വദേശി സലീം ആണ് മരണപ്പെട്ടത്. തിങ്കളാഴ്ച വൈകീട്ട് അഞ്ചുമണിയോടെ പെരുവയല്‍ പഞ്ചായത്ത് ഓഫീസിന് അടുത്തുവെച്ചായിരുന്നു അപകടം ഉണ്ടായത്.
മാവൂരില്‍നിന്ന് കോഴിക്കോട്ടേക്ക് പോകുകയായിരുന്ന സ്വകാര്യബസ് ആണ് അപകടം ഉണ്ടാക്കിയത്. അമിതവേഗത്തിലെത്തിയ ബസ് മറ്റൊരു ബസിനെ മറികടക്കാന്‍ ശ്രമിക്കുകയായിരുന്നു. ഇതിനിടെ എതിര്‍ദിശയില്‍ നിന്ന് മറ്റൊരു വാഹനം വന്നു.
അതില്‍ ഇടിക്കാതിരിക്കാന്‍ ബസ് റോഡ് അരികിലേക്ക് ചേര്‍ത്തപ്പോഴാണ് സലീമിന്റെ ബൈക്കില്‍ ഇടിച്ചത്. ഇടിയുടെ ആഘാതത്തിൽ ബസിന്റെ പിന്‍ചക്രം തലയിലൂടെ കയറി സലീം തല്‍ക്ഷണം മരിക്കുകയുമായിരുന്നു.