തിരുവനന്തപുരം: ബിഹാറിലെ എൻഡിഎയുടെ തിരഞ്ഞെടുപ്പ് വിജയം ജനങ്ങൾക്ക് വികസനവും സദ്ഭരണവും തന്നെയാണ് വേണ്ടതെന്ന വ്യക്തമായ സന്ദേശമാണ് നൽകുന്നതെന്ന് കേരളത്തിൻ്റെ ചുമതലയുള്ള മുതിർന്ന ബിജെപി നേതാവ് പ്രകാശ് ജാവ്ദേക്കർ അഭിപ്രായപ്പെട്ടു. ബിഹാറിലെ ഈ വിജയം കേരളത്തിലും, തമിഴ്നാട്ടിലും, അസമിലും വരാനിരിക്കുന്ന തിരഞ്ഞെടുപ്പുകളിൽ പ്രതിഫലിക്കുമെന്നും അദ്ദേഹം കൂട്ടിച്ചേർത്തു.(Bihar victory is a mandate for development, says Prakash Javadekar)
കേരളത്തിലെ ജനങ്ങളും പ്രധാനമന്ത്രി നരേന്ദ്ര മോദിയുടെ വികസന രാഷ്ട്രീയം തിരിച്ചറിഞ്ഞതായി ജാവ്ദേക്കർ പറഞ്ഞു. "വന്ദേഭാരത് ട്രെയിൻ മുതൽ വിഴിഞ്ഞം പോർട്ട് വരെയുള്ള പദ്ധതികൾ ഇതിൻ്റെ ഉദാഹരണങ്ങളാണ്." ലോക്‌സഭാ തിരഞ്ഞെടുപ്പിലെ ക്ഷീണത്തിൽ നിന്ന് ബിജെപി ശക്തമായി തിരിച്ചുവന്നെന്നും അദ്ദേഹം പറഞ്ഞു.
തദ്ദേശ തിരഞ്ഞെടുപ്പിലെ പ്രവർത്തനങ്ങൾ നന്നായി പുരോഗമിക്കുന്നുണ്ടെന്ന് ജാവ്ദേക്കർ വ്യക്തമാക്കി. കേരളത്തിൽ ബിജെപിയുടെ തിരഞ്ഞെടുപ്പ് വോട്ട് വിഹിതം 20 ശതമാനത്തിൽ നിന്നും 25 ശതമാനമായി ഉയർത്തും. ജനങ്ങളുമായി ബന്ധം പുലർത്തുന്നവർക്ക് മാത്രമേ മത്സരിക്കാൻ ടിക്കറ്റ് നൽകുകയുള്ളൂ.
തദ്ദേശ തിരഞ്ഞെടുപ്പിൽ ബിജെപി മികച്ച പ്രകടനം കാഴ്ചവെക്കും. വരാനിരിക്കുന്ന നിയമസഭാ തിരഞ്ഞെടുപ്പിൽ ബിജെപി ചരിത്രം രചിക്കും. ബിജെപി കേരള രാഷ്ട്രീയത്തിലെ നിർണായക ശക്തിയായി മാറുമെന്നും, എന്നാൽ ഇപ്പോൾ സീറ്റുകളുടെ എണ്ണം പ്രവചിക്കാനില്ലെന്നും പ്രകാശ് ജാവ്ദേക്കർ കൂട്ടിച്ചേർത്തു.