തിരുവനന്തപുരം: രാഹുൽ മാങ്കൂട്ടത്തിൽ പ്രതിയായ ബലാത്സംഗ കേസിലെ പരാതിക്കാരിയെ വീണ്ടും അധിക്ഷേപിച്ചതിനെത്തുടർന്ന് രാഹുൽ ഈശ്വറിനെതിരെ പൊലീസ് നടപടി കടുപ്പിക്കുന്നു. പരാതിക്കാരിയെ മോശമായി ചിത്രീകരിക്കുന്ന രീതിയിൽ രാഹുൽ തന്റെ യൂട്യൂബ് ചാനലിലൂടെ വീഡിയോകൾ പങ്കുവെച്ചത് ജാമ്യവ്യവസ്ഥകളുടെ ഗുരുതരമായ ലംഘനമാണെന്ന് സൈബർ പൊലീസ് കോടതിയിൽ സമർപ്പിച്ച അപേക്ഷയിൽ ചൂണ്ടിക്കാട്ടി.(Bail condition violated, Police file application in court to cancel Rahul Easwar's bail )
ഈ കേസിൽ നേരത്തെ ജാമ്യം അനുവദിച്ചപ്പോൾ, പരാതിക്കാരിക്കെതിരെ യാതൊരുവിധ മോശം പരാമർശങ്ങളും നടത്തരുതെന്ന് കോടതി കർശനമായി നിർദ്ദേശിച്ചിരുന്നു. ഇത് ലംഘിച്ചാണ് പുതിയ വീഡിയോകൾ പുറത്തുവിട്ടത്. പുതിയ വീഡിയോകൾ അതിജീവിതയുടെ അന്തസ്സിനെ ബാധിക്കുന്നതാണെന്നും അന്വേഷണത്തെ സ്വാധീനിക്കാൻ സാധ്യതയുള്ളതാണെന്നും പൊലീസ് റിപ്പോർട്ടിലുണ്ട്.
ജാമ്യം അനുവദിച്ച കോടതിയിലാണ് പൊലീസ് റിപ്പോർട്ട് നൽകിയിരിക്കുന്നത്. പൊലീസിന്റെ അപേക്ഷ പരിഗണിച്ച് കോടതി ഉടൻ തന്നെ രാഹുൽ ഈശ്വറിന് നോട്ടീസ് അയക്കും.