തിരുവനന്തപുരം: കെഎസ്ആർടിസി ബസിൽ യാത്ര ചെയ്യുകയായിരുന്ന വനിതാ അഭിഭാഷകയ്ക്ക് നേരെ സഹയാത്രക്കാരന്റെ അതിക്രമം (KSRTC Bus Harassment Attingal). ആറ്റിങ്ങലിൽ വെച്ചാണ് സംഭവം നടന്നത്. ബസ് ആറ്റിങ്ങൽ സ്റ്റാൻഡിൽ എത്തിയപ്പോൾ അഭിഭാഷക വിവരം മറ്റ് യാത്രക്കാരോട് തുറന്നുപറയുകയായിരുന്നു.
യാത്രക്കിടെയാണ് പ്രതി അഭിഭാഷകയോട് മോശമായി പെരുമാറിയത്. ബസ് സ്റ്റാൻഡിൽ എത്തിയതോടെ അഭിഭാഷക ശബ്ദമുയർത്തുകയും സഹയാത്രക്കാരോട് വിവരം വെളിപ്പെടുത്തുകയും ചെയ്തു. അഭിഭാഷക പ്രതികരിച്ചതോടെ ആൾക്കൂട്ടത്തിനിടയിൽ നിന്നും ഇയാൾ ബസ്സിൽ നിന്ന് ഇറങ്ങി ഓടി രക്ഷപ്പെടുകയായിരുന്നു.
അഭിഭാഷക ആറ്റിങ്ങൽ പോലീസിൽ പരാതി നൽകി. അതിക്രമം നടത്തിയയാളുടെ ചിത്രം പോലീസിന് ലഭിച്ചിട്ടുണ്ട്. സിസിടിവി ദൃശ്യങ്ങൾ കേന്ദ്രീകരിച്ചും അന്വേഷണം നടക്കുന്നുണ്ട്. സ്ത്രീകളുടെ സുരക്ഷ ഉറപ്പാക്കാൻ സർക്കാർ നടപടികൾ കർശനമാക്കുന്നതിനിടയിലും പൊതുഗതാഗത സംവിധാനങ്ങളിൽ ഇത്തരം സംഭവങ്ങൾ ആവർത്തിക്കുന്നത് യാത്രക്കാർക്കിടയിൽ ആശങ്കയുണ്ടാക്കുന്നുണ്ട്. പ്രതിയെ ഉടൻ പിടികൂടുമെന്ന് ആറ്റിങ്ങൽ പോലീസ് അറിയിച്ചു.
