പാലക്കാട്: വടക്കഞ്ചേരിയിൽ പോലീസിനെ കത്തിവീശി ഭീഷണിപ്പെടുത്തി വധശ്രമക്കേസ് പ്രതി രക്ഷപ്പെട്ട സംഭവത്തിൽ രണ്ട് സഹായികളെ പോലീസ് അറസ്റ്റ് ചെയ്തു. പ്രതിയെ രക്ഷപ്പെടാൻ സഹായിച്ച സഫർ (36), അനസ് (26) എന്നിവരെയാണ് വടക്കഞ്ചേരി പോലീസ് പിടികൂടിയത്. തിങ്കളാഴ്ച വൈകിട്ടായിരുന്നു നാടകീയ സംഭവങ്ങൾ അരങ്ങേറിയത്.(Attempted murder case suspect threatens police with knife and flees)
തൃശൂർ ഒല്ലൂക്കര മുളയം സ്വദേശി സിനു ആന്റണിയെ ഹെൽമറ്റ് കൊണ്ട് തലയ്ക്കടിച്ച് കൊലപ്പെടുത്താൻ ശ്രമിച്ച കേസിലെ പ്രതിയായ രാഹുലിനെ പിടികൂടാനാണ് മണ്ണുത്തി പോലീസ് വടക്കഞ്ചേരിയിൽ എത്തിയത്. പീച്ചി, മണ്ണുത്തി സ്റ്റേഷനുകളിലായി വധശ്രമം ഉൾപ്പെടെ എട്ടോളം കേസുകളിൽ പ്രതിയാണ് രാഹുൽ.
വടക്കഞ്ചേരിയിലെ ഒരു ബാറിന് സമീപം രാഹുൽ ഉണ്ടെന്ന വിവരത്തെത്തുടർന്ന് പോലീസ് സംഘം അവിടെയെത്തി. ഒരു കയ്യിൽ വിലങ്ങ് ഇടുന്നതിനിടെ രാഹുൽ കയ്യിലിരുന്ന വിലങ്ങ് കൊണ്ട് സ്വന്തം നെറ്റിയിലിടിച്ച് മുറിവേൽപ്പിച്ചു. ചോരയൊലിക്കുന്ന പ്രതിയെ കണ്ട് പോലീസ് ഒന്ന് അമ്പരന്ന നിമിഷം, സഫറും അനസും ചേർന്ന് രാഹുലിനെ ബൈക്കിൽ കയറ്റി രക്ഷപ്പെടാൻ സഹായിക്കുകയായിരുന്നു.
രക്ഷപ്പെടുന്നതിനിടെ തടയാൻ ശ്രമിച്ച പോലീസ് ഉദ്യോഗസ്ഥരെ രാഹുൽ കത്തിവീശി ഭീഷണിപ്പെടുത്തിയതായും റിപ്പോർട്ടുകളുണ്ട്. പ്രതിക്കായി മണ്ണുത്തി, വടക്കഞ്ചേരി, ആലത്തൂർ, നെന്മാറ പോലീസ് സ്റ്റേഷനുകളുടെ നേതൃത്വത്തിൽ സംയുക്ത തിരച്ചിൽ ഊർജ്ജിതമാക്കിയിരിക്കുകയാണ്. പ്രതി രാഹുൽ നിലവിൽ ഒളിവിലാണ്.