തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിൽ കോൺഗ്രസ് എംപിമാർക്ക് മത്സരിക്കാൻ ഇളവ് നൽകിയേക്കില്ല. എഐസിസി നേതൃത്വത്തിൻ്റേത് ആണ് ഈ നീക്കം. സംസ്ഥാനത്ത് ഭരണമാറ്റത്തിനുള്ള സാഹചര്യം അനുകൂലമാണെന്ന വിലയിരുത്തലിൽ പല എംപിമാരും കേരള രാഷ്ട്രീയത്തിലേക്ക് മടങ്ങാൻ ആഗ്രഹം പ്രകടിപ്പിച്ചിരുന്നുവെങ്കിലും ഹൈക്കമാൻഡ് ഇതിനോട് അനുകൂലമായല്ല പ്രതികരിക്കുന്നത് എന്നാണ് വിവരം.(Assembly elections, Congress MPs may not be allowed to contest)
എംപിമാർ കൂട്ടത്തോടെ നിയമസഭയിലേക്ക് മത്സരിക്കുകയും ജയിക്കുകയും ചെയ്താൽ ഒട്ടേറെ ലോക്സഭാ മണ്ഡലങ്ങളിൽ ഉപതെരഞ്ഞെടുപ്പ് നടത്തേണ്ടി വരും. ദേശീയ രാഷ്ട്രീയത്തിൽ ശ്രദ്ധ കേന്ദ്രീകരിക്കേണ്ടവർ സംസ്ഥാന ഭരണത്തിനായി മടങ്ങുന്നത് ജനങ്ങൾക്കിടയിൽ തെറ്റായ സന്ദേശം നൽകുമെന്നും ബിജെപിയും എൽഡിഎഫും ഇത് പ്രചാരണ ആയുധമാക്കുമെന്നും ഒരു വിഭാഗം നേതാക്കൾ മുന്നറിയിപ്പ് നൽകുന്നു.
ഒഴിവു വരുന്ന ലോക്സഭാ സീറ്റുകളിൽ വിജയസാധ്യതയുള്ള പുതിയ സ്ഥാനാർത്ഥികളെ കണ്ടെത്തുക എന്നത് വലിയ തലവേദനയാകുമെന്ന് എഐസിസി ഭയപ്പെടുന്നു. ഒന്നോ രണ്ടോ പേർക്ക് ഇളവ് നൽകിയാൽ കൂടുതൽ എംപിമാർ ഇതേ അവകാശവാദവുമായി രംഗത്തെത്തുന്നത് പാർട്ടിയിൽ തർക്കങ്ങൾക്ക് ഇടയാക്കും.
തദ്ദേശ തെരഞ്ഞെടുപ്പിലെ വിജയത്തോടെ യുഡിഎഫ് ക്യാമ്പിൽ ആത്മവിശ്വാസം വർദ്ധിച്ചിട്ടുണ്ട്. പല എംപിമാരും ഹൈക്കമാൻഡിനെ നേരിട്ട് കണ്ട് തങ്ങളുടെ മത്സര സന്നദ്ധത അറിയിച്ചതായാണ് സൂചന. എന്നാൽ 'മിനി ലോക്സഭാ തെരഞ്ഞെടുപ്പ്' എന്ന സാഹചര്യം ഒഴിവാക്കാൻ നിലവിലെ എംപിമാർ ലോക്സഭയിൽ തന്നെ തുടരുന്നതാണ് ഉചിതമെന്ന വാദത്തിനാണ് ഇപ്പോൾ മുൻഗണന ലഭിക്കുന്നത്.