തിരുവനന്തപുരം: കേരള നിയമസഭാ തിരഞ്ഞെടുപ്പിന് മുന്നോടിയായുള്ള നിർണ്ണായക സ്ഥാനാർത്ഥി ചർച്ചകൾക്കായി യുഡിഎഫ് നേതൃത്വം ദേശീയ തലസ്ഥാനത്ത്. പ്രതിപക്ഷ നേതാവ് വി.ഡി. സതീശൻ, കെപിസിസി അധ്യക്ഷൻ സണ്ണി ജോസഫ് എന്നിവരുടെ നേതൃത്വത്തിലുള്ള സംഘം ഇന്ന് ഹൈക്കമാൻഡുമായി കൂടിക്കാഴ്ച നടത്തും. (Assembly elections, Congress leadership in Delhi for candidate discussions)
എഐസിസി അധ്യക്ഷൻ മല്ലികാർജ്ജുൻ ഖർഗെ, രാഹുൽ ഗാന്ധി എന്നിവരുമായാണ് ചർച്ചകൾ നിശ്ചയിച്ചിരിക്കുന്നത്. വിജയസാധ്യതയുള്ള പുതുമുഖങ്ങൾക്കും യുവാക്കൾക്കും പ്രാധാന്യം നൽകിക്കൊണ്ടുള്ള പ്രാഥമിക പട്ടിക ചർച്ച ചെയ്യും.
ഘടകകക്ഷികളുമായുള്ള സീറ്റ് വിഭജനത്തിലെ പുരോഗതി ഹൈക്കമാൻഡിനെ അറിയിക്കും. ഭരണവിരുദ്ധ വികാരം വോട്ടാക്കി മാറ്റാനുള്ള പ്രചാരണ പരിപാടികൾക്ക് രൂപം നൽകും. ശശി തരൂർ എംപി ഡൽഹിയിലെ ചർച്ചകളിൽ നിന്ന് വിട്ടുനിൽക്കുകയാണ്.