ഇന്ത്യൻ ശാസ്ത്രലോകത്തെ ഒരു തിളങ്ങുന്ന താരമാണ് അന്ന മാണി എന്ന മലയാളി വനിത. 'ഇന്ത്യയുടെ വെതർ വുമൺ' (Weather Woman of India) എന്ന് ലോകമെമ്പാടും അറിയപ്പെടുന്ന അന്ന മാണി, കാലാവസ്ഥാ നിരീക്ഷണത്തിലും പ്രവചനത്തിലും ഇന്ത്യയെ ലോകനിലവാരത്തിലേക്ക് എത്തിക്കുന്നതിൽ നിർണായക പങ്ക് വഹിച്ചു.(Anna Mani, the Weather Woman of India)
1918 ഓഗസ്റ്റ് 23-ന് പഴയ തിരുവിതാംകൂറിലെ പീരുമേട്ടിൽ ഒരു സമ്പന്ന കുടുംബത്തിലാണ് അന്ന മാണി ജനിച്ചത്. എട്ട് മക്കളിൽ ഏഴാമത്തെ കുട്ടിയായിരുന്നു അവർ. ചെറുപ്പത്തിൽ തന്നെ വായനയോട് വലിയ താൽപര്യമുണ്ടായിരുന്ന അന്ന, തന്റെ എട്ടാം വയസ്സിൽ കുടുംബം സമ്മാനിച്ച വജ്രക്കമ്മലുകൾ വേണ്ടെന്ന് വെച്ച് പകരം എൻസൈക്ലോപീഡിയ ബ്രിട്ടാനിക്ക ആവശ്യപ്പെട്ട കഥ പ്രശസ്തമാണ്.
സാഹിത്യത്തിലും നൃത്തത്തിലും കമ്പമുണ്ടായിരുന്നെങ്കിലും വായനയിലൂടെ അന്ന ഭൗതികശാസ്ത്രത്തിലേക്ക് ആകർഷിക്കപ്പെട്ടു. 1939-ൽ മദ്രാസിലെ പ്രസിഡൻസി കോളേജിൽ നിന്ന് ഭൗതികശാസ്ത്രത്തിലും രസതന്ത്രത്തിലും ബി.എസ്.സി. (ഓണേഴ്സ്) ബിരുദം നേടി.
ഗവേഷണരംഗത്തെ തുടക്കം
ബിരുദാനന്തരം, അന്ന മാണി ബാംഗ്ലൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിൽ പ്രശസ്ത ശാസ്ത്രജ്ഞനായ സി.വി. രാമന്റെ ശിക്ഷണത്തിൽ ഗവേഷണം ആരംഭിച്ചു. വജ്രങ്ങളുടെയും റൂബികളുടെയും സ്പെക്ട്രോസ്കോപ്പിയെക്കുറിച്ചായിരുന്നു അവരുടെ പഠനം. ഈ രംഗത്ത് അഞ്ച് ഗവേഷണ പ്രബന്ധങ്ങൾ അവർ രചിച്ചെങ്കിലും, ബിരുദാനന്തര ബിരുദം ഇല്ലാത്തതിനാൽ മദ്രാസ് സർവ്വകലാശാല അവർക്ക് ഡോക്ടറേറ്റ് നൽകാൻ വിസമ്മതിച്ചു. എന്നിരുന്നാലും, അവരുടെ ഗവേഷണത്തിന്റെ മൗലികത കണക്കിലെടുത്ത് പ്രബന്ധം ഇന്നും ബാംഗ്ലൂരിലെ രാമൻ ആർക്കൈവ്സിൽ സൂക്ഷിച്ചിട്ടുണ്ട്.
കാലാവസ്ഥാ ഉപകരണങ്ങളിലേക്കുള്ള വഴി
തുടർന്ന്, 1945-ൽ കാലാവസ്ഥാ ഉപകരണങ്ങളെക്കുറിച്ച് പഠിക്കാൻ അവർ ലണ്ടനിലെ ഇംപീരിയൽ കോളേജിൽ എത്തി. ഇന്ത്യയിൽ തിരിച്ചെത്തിയ ശേഷം അന്ന മാണി ഇന്ത്യൻ കാലാവസ്ഥാ വകുപ്പിൽ ചേർന്നു. അന്തരീക്ഷ പഠനത്തിനായുള്ള ഉപകരണങ്ങൾ നിർമ്മിക്കുന്നതിൽ ഇന്ത്യയ്ക്ക് സ്വയംപര്യാപ്തത നേടിക്കൊടുക്കുന്നതിൽ അന്ന മാണി സുപ്രധാന പങ്ക് വഹിച്ചു.
അന്നയുടെ നേതൃത്വത്തിൽ അന്തരീക്ഷ പഠന ഉപകരണങ്ങൾ ഇന്ത്യയിൽ തന്നെ നിർമ്മിക്കാനുള്ള പദ്ധതിക്ക് തുടക്കമിട്ടു. ഏകദേശം നൂറോളം കാലാവസ്ഥാ ഉപകരണങ്ങളുടെ മാനകീകരണം അവർ നിർണയിക്കുകയും അവയുടെ ഉത്പാദനം ആരംഭിക്കുകയും ചെയ്തു. വിദേശ ഇറക്കുമതിയെ ആശ്രയിക്കുന്നത് കുറയ്ക്കാൻ ഇത് ഇന്ത്യയെ സഹായിച്ചു.
അന്ന മാണിയുടെ മറ്റൊരു പ്രധാന സംഭാവന ഓസോൺ പാളിയെക്കുറിച്ചുള്ള ഗവേഷണങ്ങളാണ്. അന്തരീക്ഷത്തിലെ ഓസോണിനെ അളക്കുന്നതിനുള്ള 'ഓസോൺസോണ്ട്' എന്ന ഉപകരണം അവർ രൂപകൽപ്പന ചെയ്തു. അന്താരാഷ്ട്ര ഓസോൺ കമ്മീഷനിലും അവർ അംഗമായിരുന്നു.
സൗരോർജ്ജം, പവനോർജ്ജം (കാറ്റിൽ നിന്നുള്ള ഊർജ്ജം) എന്നീ മേഖലകളിലും അന്ന മാണി തൻ്റെ സംഭാവനകൾ നൽകി. സൗരോർജ്ജ വികിരണത്തെക്കുറിച്ച് അവർ രചിച്ച രണ്ട് ഗ്രന്ഥങ്ങൾ (Handbook of Solar Radiation Data for India - 1980, Solar Radiation Over India - 1981) ഈ വിഷയത്തിലെ മികച്ച റഫറൻസ് ഗ്രന്ഥങ്ങളാണ്. ഇന്ത്യയിലെ പവനോർജ്ജ സാധ്യതയെ സംബന്ധിച്ച് മറ്റൊരു ഗ്രന്ഥവും (Wind Energy Data of India - 1983) അവർ പ്രസിദ്ധീകരിച്ചു.
രാജ്യത്തുടനീളം 700-ൽ അധികം കേന്ദ്രങ്ങളിൽ കാറ്റിന്റെ വേഗത അളക്കുന്നതിനുള്ള പഠനങ്ങൾക്ക് അവർ നേതൃത്വം നൽകി. ഇന്ത്യൻ കാലാവസ്ഥാ വകുപ്പിൽ ഡെപ്യൂട്ടി ഡയറക്ടർ ജനറൽ പദവിയിലെത്തിയ ഏക വനിതയാണ് അന്ന മാണി. 1976-ൽ അവർ ഡെപ്യൂട്ടി ഡയറക്ടർ ജനറലായി വിരമിച്ചു.
1963-ൽ തുമ്പയിൽ നിന്ന് ആദ്യത്തെ റോക്കറ്റ് വിക്ഷേപണം നടത്തുന്ന അവസരത്തിൽ വിക്രം സാരാഭായിയുടെ ക്ഷണപ്രകാരം വിക്ഷേപണത്തിനാവശ്യമായ അന്തരീക്ഷ പഠന സംവിധാനങ്ങൾ ഒരുക്കിയത് അന്ന മാണിയും സഹപ്രവർത്തകരുമാണ്. ഗാന്ധിജിയുടെ ആശയങ്ങളിൽ ആകൃഷ്ടയായി ലളിതമായ ജീവിതം നയിച്ചിരുന്ന അവർ ജീവിതകാലം മുഴുവൻ ഖാദി വസ്ത്രങ്ങൾ മാത്രമാണ് ഉപയോഗിച്ചിരുന്നത്. ശാസ്ത്രത്തെ ജീവിതപങ്കാളിയായി വരിച്ച അന്ന മാണി വിവാഹിതയായിരുന്നില്ല.
1987-ൽ ശാസ്ത്രരംഗത്തെ ശ്രദ്ധേയമായ സംഭാവനകൾക്ക് അവർക്ക് ഐ.എൻ.എസ്.എ കെ.ആർ രാമനാഥൻ മെഡൽ ലഭിച്ചു. ദീർഘകാലം ഇന്ത്യൻ കാലാവസ്ഥാ പഠനത്തിന് അടിത്തറ പാകിയ അന്ന മാണി, 2001 ഓഗസ്റ്റ് 16-ന് തിരുവനന്തപുരത്ത് വെച്ച് അന്തരിച്ചു. അവരുടെ ആഗ്രഹപ്രകാരം മതപരമായ ചടങ്ങുകൾ ഒഴിവാക്കിയാണ് അന്ത്യകർമ്മങ്ങൾ നടത്തിയത്. ഇന്ത്യൻ ശാസ്ത്രത്തിന് മഹത്തായ സംഭാവനകൾ നൽകിയ ഒരു പ്രതിഭയാണ് അന്ന മാണി. അവരുടെ ഗവേഷണങ്ങളാണ് കൃത്യമായ കാലാവസ്ഥാ പ്രവചനങ്ങൾ നടത്താൻ ഇന്ത്യയെ പ്രാപ്തമാക്കിയത്.