ആലപ്പുഴ: ജില്ലയിലെ ഒമ്പത് പഞ്ചായത്തുകളിൽ പക്ഷിപ്പനി സ്ഥിരീകരിച്ചതിനെത്തുടർന്ന് വെള്ളിയാഴ്ച മുതൽ പക്ഷികളെ കൂട്ടത്തോടെ കൊന്നൊടുക്കാൻ മൃഗസംരക്ഷണ വകുപ്പ് തീരുമാനിച്ചു. രോഗബാധയുടെ പ്രഭവകേന്ദ്രത്തിന് ഒരു കിലോമീറ്റർ ചുറ്റളവിലുള്ള ഏകദേശം 19,881 വളർത്തുപക്ഷികളെയാണ് ഈ ഘട്ടത്തിൽ നശിപ്പിക്കുന്നത്.
തകഴി, കാർത്തികപ്പള്ളി, കുമാരപുരം, കരുവാറ്റ, പുന്നപ്ര സൗത്ത്, പുറക്കാട്, ചെറുതന, നെടുമുടി, അമ്പലപ്പുഴ സൗത്ത് എന്നീ പഞ്ചായത്തുകളിലാണ് ഇത്തവണ രോഗബാധ റിപ്പോർട്ട് ചെയ്തിരിക്കുന്നത്. പുന്നപ്ര സൗത്ത് (5672), ചെറുതന (4500), പുറക്കാട് (4000), അമ്പലപ്പുഴ സൗത്ത് (4000) എന്നിവിടങ്ങളിലാണ് ഏറ്റവും കൂടുതൽ പക്ഷികളെ കൊന്നൊടുക്കേണ്ടി വരുന്നത്. നെടുമുടിയിൽ 386 പക്ഷികളെയും തകഴിയിൽ 305 പക്ഷികളെയും നശിപ്പിക്കും.
കള്ളിങ് അശാസ്ത്രീയമാണെന്നാണ് കർഷകരുടെ പക്ഷം. വളർത്തുപക്ഷികളെ കൊന്നൊടുക്കിയാലും കാക്കകളും മറ്റ് ദേശാടനപക്ഷികളും വഴി രോഗം പടരുന്നത് തടയാൻ കഴിയില്ലെന്ന് മുൻവർഷങ്ങളിലെ അനുഭവം ചൂണ്ടിക്കാട്ടി കർഷകർ പറയുന്നു.ഡിസംബർ ആദ്യവാരം തന്നെ രോഗലക്ഷണങ്ങൾ കണ്ടുതുടങ്ങിയിട്ടും നടപടികൾ വൈകിയെന്ന് കർഷകർ ആരോപിക്കുന്നു. ഇതിനകം തന്നെ 25,000-ത്തിലധികം താറാവുകൾ ചത്തുകഴിഞ്ഞു. ഇപ്പോൾ കള്ളിങ് നടത്തുന്നത് ബാക്കിയുള്ളവയെ മാത്രമാണെന്നും ഇത് രോഗം പടർന്ന ശേഷം നടത്തുന്ന വൈകിയ നടപടിയാണെന്നും കർഷകർ കുറ്റപ്പെടുത്തുന്നു.
ദ്രുതകർമ സേനകൾക്കുള്ള (RRT) സജ്ജീകരണങ്ങൾ മൃഗസംരക്ഷണ വകുപ്പ് പൂർത്തിയാക്കിയിട്ടുണ്ട്. പക്ഷികളെ ദഹിപ്പിക്കുന്നതിനാവശ്യമായ വിറകും ഇന്ധനവും അതത് പഞ്ചായത്തുകൾ ലഭ്യമാക്കും. പക്ഷികൾ കൂട്ടത്തോടെ ചത്തൊടുങ്ങുന്ന സാഹചര്യത്തിൽ കർഷകർക്കുണ്ടാകുന്ന നഷ്ടത്തിന് അർഹമായ നഷ്ടപരിഹാരം ഉടൻ ലഭ്യമാക്കണമെന്ന ആവശ്യവും ശക്തമാണ്.