തിരുവനന്തപുരം : പാർട്ടി സമ്മേളനങ്ങളിൽ വി.എസ്.അച്യുതാനന്ദനെതിരെ ക്യാപിറ്റല്‍ പണിഷ്‌മെന്‍റ് പരാമര്‍ശം ഉണ്ടായിട്ടില്ലെന്ന് സിപിഎം കേന്ദ്ര കമ്മിറ്റി അംഗം എ.കെ.ബാലന്‍. സമ്മേളനത്തില്‍ നടക്കുന്ന ചര്‍ച്ചകള്‍ എന്താണെന്ന് തങ്ങള്‍ ആരും പുറത്തു പറയാറില്ല. പാര്‍ട്ടിയുടെ അന്തസ്സിന് ചേരുന്ന ചര്‍ച്ചകള്‍ ഉണ്ടായിട്ടുണ്ട്.
പല കാര്യങ്ങളും ചര്‍ച്ചയില്‍ വന്നിട്ടുണ്ട്. എന്നാല്‍ വിഎസിനെ വിശേഷിപ്പിച്ച വാക്ക് സമ്മേളനത്തില്‍ തങ്ങള്‍ എവിടെയും കേട്ടിട്ടില്ലെന്നും എ കെ ബാലന്‍ തിരുവനന്തപുരത്ത് പറഞ്ഞു.പാര്‍ട്ടിയുടെ അന്തസിന് ചേരുന്ന ചര്‍ച്ചകള്‍ ഉണ്ടായിട്ടുണ്ട്.
വി.എസ് മൗലികത ഉള്ള വ്യക്തിയായിരുന്നു.ഇണങ്ങിയും പിണങ്ങിയും നിരവധി ചരിത്ര സംഭവങ്ങള്‍ക്ക് രൂപം നല്‍കിയ വ്യക്തിയാണ് വി എസ്. തെറ്റായ വഴിയിലേക്ക് നീങ്ങുമ്പോള്‍ ശരിയായ വഴിയിലേക്ക് കൊണ്ടുവരാന്‍ അദ്ദേഹം ഇടപെടല്‍ നടത്തി. വിപ്ലവകാരികളായ സഖാക്കളെ മര്യാദയ്ക്ക് ജീവിക്കാന്‍ സമ്മതിച്ചിട്ടില്ലെന്നും നശിപ്പിക്കാനേ ശ്രമിച്ചിട്ടുള്ളൂവെന്നും എ കെ ബാലന്‍ കൂട്ടിച്ചേര്‍ത്തു.