തിരുവനന്തപുരം: രാജ്യത്ത് വർദ്ധിച്ചുവരുന്ന ഒടിപി അധിഷ്ഠിത ബാങ്ക് തട്ടിപ്പുകളെ നേരിടാൻ വിപ്ലവകരമായ എഐ സംവിധാനം അവതരിപ്പിച്ച് എയർടെൽ (Airtel AI Fraud Alert). തട്ടിപ്പുകാരോട് ഫോണിൽ സംസാരിച്ചുകൊണ്ടിരിക്കെ തന്നെ ബാങ്ക് ഒടിപി ഫോണിലേക്ക് വരികയാണെങ്കിൽ, അപകടസാധ്യതയെക്കുറിച്ച് ഉപഭോക്താവിന് തത്സമയം മുന്നറിയിപ്പ് നൽകുന്നതാണ് ഈ സംവിധാനം.
എങ്ങനെയാണ് ഈ സംവിധാനം പ്രവർത്തിക്കുന്നത്?
ഒരാൾ തട്ടിപ്പാകാൻ സാധ്യതയുള്ള ഒരു കോളിൽ ഏർപ്പെട്ടിരിക്കെ, അതേസമയം തന്നെ അയാളുടെ ഫോണിലേക്ക് ഒരു ബാങ്ക് ഒടിപി വരികയാണെങ്കിൽ എയർടെൽ അത് തിരിച്ചറിയും.സംഭാഷണത്തിനിടയിൽ തന്നെ അപകടസാധ്യതയെക്കുറിച്ച് സിസ്റ്റം മുന്നറിയിപ്പ് നൽകും. ഇത് ഉപഭോക്താവിന് ഒടിപി കൈമാറുന്നതിന് മുൻപ് ചിന്തിക്കാനും അത് തടയാനും സമയം നൽകുന്നു.
മനുഷ്യരുടെ വിവേചനബുദ്ധിയും എഐയുടെ വേഗതയും സമന്വയിപ്പിച്ചാണ് ഇത് രൂപകൽപ്പന ചെയ്തിരിക്കുന്നത്. നിലവിൽ ഹരിയാനയിൽ പരീക്ഷണാടിസ്ഥാനത്തിൽ പ്രവർത്തിക്കുന്ന ഈ സംവിധാനം, അടുത്ത രണ്ടാഴ്ചയ്ക്കുള്ളിൽ രാജ്യത്തെ 100% എയർടെൽ ഉപഭോക്താക്കളിലേക്കും എത്തും.
“ഡിജിറ്റൽ ഇടപാടുകളെ സുരക്ഷിതമാക്കുന്ന ഒടിപികളെ ക്രിമിനലുകൾ ആയുധമാക്കുകയാണ്. ഇതിനെതിരെ ബാങ്കിങ് സുരക്ഷ ശക്തിപ്പെടുത്താനാണ് അത്യാധുനിക നെറ്റുവർക്ക് ലെയർ ഞങ്ങൾ ഒരുക്കുന്നത്,” — ശാശ്വത് ശർമ്മ (മാനേജിങ് ഡയറക്ടർ & സിഇഒ, എയർടെൽ ഇന്ത്യ) പറഞ്ഞു.
