പാലക്കാട്: പേരാമ്പ്ര സംഘർഷവുമായി ബന്ധപ്പെട്ട് എം.പി. ഷാഫി പറമ്പിലിനെതിരെ നിയമനടപടി സ്വീകരിക്കാൻ വടകര കൺട്രോൾ റൂം ഇൻസ്പെക്ടർ എസ്.എച്ച്.ഒ. അഭിലാഷ് ഡേവിഡ് അനുമതി തേടി. ഉന്നത ഉദ്യോഗസ്ഥരോടാണ് അദ്ദേഹം അനുമതി തേടിയിരിക്കുന്നത്.(Abhilash David seeks permission to take legal action against Shafi Parambil on the allegation )
പേരാമ്പ്ര സംഘർഷസമയത്ത് ഷാഫി പറമ്പിൽ എം.പി. തനിക്കെതിരെ അപകീർത്തികരമായ പരാമർശങ്ങൾ നടത്തി എന്നാണ് അഭിലാഷ് ഡേവിഡിന്റെ ആരോപണം. ഇതുമായി ബന്ധപ്പെട്ട് അദ്ദേഹം വടകര റൂറൽ എസ്.പിക്ക് അപേക്ഷ നൽകിയിട്ടുണ്ട്. ഈ അപേക്ഷ എസ്.പി. തുടർനടപടിക്കായി ഡി.ജി.പിക്ക് കൈമാറിയിരിക്കുകയാണ്.
പേരാമ്പ്രയിൽ സംഘർഷം നടന്ന സമയത്ത് ഇൻസ്പെക്ടർ അഭിലാഷ് ഡേവിഡ് ആണ് തന്നെ മർദ്ദിച്ചതെന്നായിരുന്നു ഷാഫി പറമ്പിൽ എം.പി. നേരത്തെ ഉന്നയിച്ച ആരോപണം. ഈ ആരോപണത്തിന് പിന്നാലെയാണ് പോലീസ് ഉദ്യോഗസ്ഥൻ എം.പി.ക്കെതിരെ നിയമനടപടിക്കൊരുങ്ങുന്നത്.
നിയമപരമായ നടപടികളുമായി മുന്നോട്ട് പോകുന്നതിന് മുമ്പ് ഉന്നത പോലീസ് നേതൃത്വത്തിന്റെ അനുമതി ആവശ്യമായതിനാലാണ് അദ്ദേഹം ഡി.ജി.പിക്ക് അപേക്ഷ നൽകിയിരിക്കുന്നത്.