ആലുവ: കേരളത്തിലെ കൊലപാതക ചരിത്രത്തിലെ ഏറ്റവും ഭീകരമായ അധ്യായങ്ങളിലൊന്നായ ആലുവ കൂട്ടക്കൊലപാതകം നടന്നിട്ട് നാളെ 25 വർഷം തികയുന്നു. 2001 ജനുവരി ആറിന് ആലുവ സബ് ജയിൽ റോഡിലെ മാഞ്ഞൂരാൻ വീട്ടിൽ ഒരേ കുടുംബത്തിലെ ആറ് പേർ കൊല്ലപ്പെട്ട വാർത്ത കേട്ടാണ് കേരളം അന്ന് ഉണർന്നത്.(25 years have passed since the Aluva massacre, A bloody day in January)
മാഞ്ഞൂരാൻ ഹാർഡ്വെയേഴ്സ് ഉടമ അഗസ്റ്റിൻ (47), ഭാര്യ ബേബി (42), മക്കളായ ജെസ്മോൻ (14), ദിവ്യ (12), അഗസ്റ്റിന്റെ സഹോദരി കൊച്ചുറാണി (42), അമ്മ ക്ലാര (74) എന്നിവരാണ് അന്ന് ക്രൂരമായി കൊല്ലപ്പെട്ടത്. ഇവരുടെ അടുത്ത ബന്ധുവായ എം.എ. ആന്റണി എന്ന 'ബ്ലാക്ക് ബെൽറ്റ് ആന്റപ്പൻ' ആയിരുന്നു കൊലയാളി.
വിദേശത്ത് പോകാൻ കൊച്ചുറാണി വാഗ്ദാനം ചെയ്ത പണം ലഭിക്കാത്തതിലുള്ള വൈരാഗ്യമാണ് കൂട്ടക്കൊലയിലേക്ക് നയിച്ചത്. സിനിമയ്ക്ക് പോയ അഗസ്റ്റിനെയും കുടുംബത്തെയും കാത്തിരുന്ന്, വീട്ടിലുണ്ടായിരുന്ന കൊച്ചുറാണിയെയും ക്ലാരയെയും ആദ്യം വകവരുത്തിയ ആന്റണി, പിന്നീട് തിരിച്ചെത്തിയ അഗസ്റ്റിനെയും ഭാര്യയെയും കുഞ്ഞുങ്ങളെയും ഓരോരുത്തരായി വെട്ടിവീഴ്ത്തുകയായിരുന്നു.
കൊലപാതകത്തിന് ശേഷം മുംബൈ വഴി സൗദി അറേബ്യയിലേക്ക് കടന്ന ആന്റണിയെ പിടികൂടുക എന്നത് പോലീസിന് വെല്ലുവിളിയായിരുന്നു. അന്ന് സൗദിയുമായി കുറ്റവാളികളെ കൈമാറാനുള്ള കരാർ ഇല്ലാതിരുന്നതിനാൽ, ആന്റണിയുടെ ഭാര്യ ജമ്മയെ സ്വാധീനിച്ചാണ് പോലീസ് തന്ത്രപരമായ നീക്കം നടത്തിയത്. 2001 ഫെബ്രുവരി 11-ന് മുംബൈ വിമാനത്താവളത്തിൽ വെച്ച് ഇയാൾ പിടിയിലായി.
2005-ൽ ജഡ്ജി ബി. കമാൽ പാഷ ആന്റണിക്ക് വധശിക്ഷ വിധിച്ചു. കേരളത്തിലെ സിബിഐ കോടതിയുടെ ചരിത്രത്തിലെ ആദ്യ വധശിക്ഷയായിരുന്നു ഇത്. ഹൈക്കോടതി 2006-ൽ വധശിക്ഷ ശരിവെച്ചു. ദീർഘകാലത്തെ നിയമപോരാട്ടത്തിനൊടുവിൽ 2018-ൽ സുപ്രീംകോടതി ആന്റണിയുടെ വധശിക്ഷ ജീവപര്യന്തമായി കുറച്ചു.
നിലവിൽ തിരുവനന്തപുരം കാട്ടാക്കടയിലെ തുറന്ന ജയിലിൽ കഴിയുന്ന ആന്റണി ഇപ്പോൾ പരോളിൽ നാട്ടിലുണ്ട്. കൊലപാതകം നടന്ന മാഞ്ഞൂരാൻ വീട് കാലപ്പഴക്കത്താൽ പൊളിച്ചുമാറ്റി. ഇന്ന് ആ സ്ഥലത്തിന്റെ ഒരു ഭാഗത്ത് പുതിയ വീട് ഉയർന്നു കഴിഞ്ഞു. തൃക്കാക്കരയിൽ അധ്യാപികയായിരുന്ന ആന്റണിയുടെ ഭാര്യയും മകനും പിന്നീട് തമിഴ്നാട്ടിലേക്ക് താമസം മാറി.