തിരുവനന്തപുരം: വരാനിരിക്കുന്ന തിരഞ്ഞെടുപ്പിന്റെ പശ്ചാത്തലത്തിൽ, തിരുവനന്തപുരം കോർപ്പറേഷനിലേക്കുള്ള പ്രകടനപത്രിക ബി.ജെ.പി. പുറത്തിറക്കി. ബി.ജെ.പി. സംസ്ഥാന അധ്യക്ഷൻ രാജീവ് ചന്ദ്രശേഖറാണ് പ്രകടനപത്രിക പ്രകാശനം ചെയ്തത്. പ്രകടനപത്രികയിലെ ഏറ്റവും ശ്രദ്ധേയമായ വാഗ്ദാനം 2036-ലെ ഒളിമ്പിക്സ് തിരുവനന്തപുരത്ത് നടത്തുമെന്നതാണ്.(2036 Olympics in Thiruvananthapuram, BJP manifesto with big announcements)
ഒളിമ്പിക്‌സിന്റെ വേദികളിലൊന്ന് തിരുവനന്തപുരമായിരിക്കുമെന്നും ഇതിനായി കേന്ദ്രസർക്കാരിൽ ശക്തമായ സമ്മർദ്ദം ചെലുത്തുമെന്നുമാണ് പ്രകടനപത്രികയിൽ പറയുന്നത്. കോർപ്പറേഷനിൽ അധികാരത്തിലേറി 45 ദിവസത്തിനകം തിരുവനന്തപുരം നഗരത്തിന്റെ സമഗ്രവികസനത്തിനായി തയാറാക്കുന്ന രൂപരേഖ പ്രസിദ്ധീകരിക്കും. പ്രധാനമന്ത്രി നരേന്ദ്ര മോദി നേരിട്ട് ഇതിനായി എത്തുമെന്ന് ബി.ജെ.പി. നേരത്തെ അറിയിച്ചിരുന്നു.
2030-ഓടെ ഇന്ത്യയിലെ ഏറ്റവും മികച്ച മൂന്ന് നഗരങ്ങളിലൊന്നായി തിരുവനന്തപുരത്തെ മാറ്റുമെന്നും പ്രകടനപത്രികയിൽ വാഗ്ദാനം ചെയ്യുന്നു. നടപ്പാക്കുന്ന പദ്ധതികളുടെ പ്രോഗ്രസ് കാർഡ് എല്ലാ വർഷവും പുറത്തിറക്കും. എല്ലാ വാർഡുകളിലും കുടുംബാരോഗ്യ കേന്ദ്രങ്ങൾ സ്ഥാപിക്കും.