തിരുവനന്തപുരം: സംസ്ഥാന തെരഞ്ഞെടുപ്പ് കമ്മീഷൻ പുറത്തുവിട്ട ഔദ്യോഗിക കണക്കുകൾ പ്രകാരം, 2025-ലെ കേരള തദ്ദേശ സ്വയംഭരണ തെരഞ്ഞെടുപ്പിൽ (Local Body Election )യുഡിഎഫ് വലിയ മുന്നേറ്റം നടത്തി. വോട്ട് വിഹിതത്തിൽ ഭരണകക്ഷിയായ എൽഡിഎഫിനെക്കാൾ 5.36 ശതമാനം അധികം നേടാൻ യുഡിഎഫിന് സാധിച്ചു. യുഡിഎഫ് ആകെ 38.81 ശതമാനം വോട്ട് നേടിയപ്പോൾ എൽഡിഎഫിന്റെ വിഹിതം 33.45 ശതമാനമായി ചുരുങ്ങി. ഈ വോട്ട് വ്യത്യാസം നിയമസഭാ തെരഞ്ഞെടുപ്പിന് ഒരുങ്ങുന്ന മുന്നണികൾക്ക് നിർണ്ണായക സൂചനയാണ് നൽകുന്നത്.
വോട്ട് എണ്ണത്തിൽ എൽഡിഎഫിനെക്കാൾ ഏകദേശം 11.38 ലക്ഷം വോട്ടുകൾ അധികം നേടാൻ യുഡിഎഫിന് കഴിഞ്ഞു എന്നത് ശ്രദ്ധേയമാണ്. യുഡിഎഫ് ആകെ 82.37 ലക്ഷം വോട്ടുകൾ നേടിയപ്പോൾ എൽഡിഎഫിന് ലഭിച്ചത് 70.99 ലക്ഷം വോട്ടുകളാണ്. ബിജെപി നേതൃത്വം നൽകുന്ന എൻഡിഎ 14.71 ശതമാനം വോട്ട് (31.21 ലക്ഷം) കരസ്ഥമാക്കി മൂന്നാം സ്ഥാനത്തെത്തി. സ്വതന്ത്രർ ഉൾപ്പെടെയുള്ള മറ്റുള്ളവർ 13.03 ശതമാനം വോട്ടും നേടിയിട്ടുണ്ട്.
സംസ്ഥാന തെരഞ്ഞെടുപ്പ് കമ്മീഷണർ എ. ഷാജഹാൻ ഇത് സംബന്ധിച്ച പൂർണ്ണമായ റിപ്പോർട്ട് ഗവർണർക്ക് കൈമാറി. തെരഞ്ഞെടുപ്പ് പ്രക്രിയ സമാധാനപരമായും വിജയകരമായും പൂർത്തിയാക്കിയതിന് കമ്മീഷണറെ ഗവർണർ അഭിനന്ദിച്ചു. വരും ദിവസങ്ങളിൽ രാഷ്ട്രീയ പാർട്ടികൾ ഈ കണക്കുകൾ മുൻനിർത്തിയുള്ള അവലോകനങ്ങളിലേക്ക് കടക്കും.
The official vote share for the 2025 Kerala Local Body Elections shows a significant lead for the UDF over the LDF. The UDF secured 38.81% of the total votes, while the LDF managed 33.45%, resulting in a 5.36% margin between the two major fronts. With the UDF receiving over 11 lakh more votes than the LDF, and the NDA securing a 14.71% share, the final report has been submitted to the Governor by the State Election Commissioner.