കോഴിക്കോട്: ഉത്തരകേരളത്തിൽ നിന്നുള്ള യാത്രക്കാർക്ക് ആശ്വാസമായി തമിഴ്നാട്ടിലേക്ക് രണ്ട് പുതിയ പ്രതിവാര എക്സ്പ്രസ് ട്രെയിനുകൾ കൂടി വരുന്നു. മംഗളൂരു – രാമേശ്വരം എക്സ്പ്രസ്, മംഗളൂരു – താംബരം അമൃത് ഭാരത് സ്ലീപ്പർ എക്സ്പ്രസ് എന്നിവയാണ് പുതുതായി ആരംഭിക്കുന്നത്. മാർച്ച് ഒന്നിന് മധുരയിൽ വെച്ച് പ്രധാനമന്ത്രി നരേന്ദ്ര മോദി ട്രെയിനുകൾ ഫ്ലാഗ് ഓഫ് ചെയ്യും.(2 more new trains for Malabar, services to start on March 1)
മംഗളൂരു – രാമേശ്വരം എക്സ്പ്രസ് കണ്ണൂർ, കോഴിക്കോട്, പാലക്കാട്, പൊള്ളാച്ചി, മധുര വഴി രാമേശ്വരത്തെത്തും. മലബാറിൽ നിന്ന് രാമേശ്വരത്തേക്ക് ലഭിക്കുന്ന ആദ്യ നേരിട്ടുള്ള ട്രെയിൻ സർവീസാണിത്. ഏർവാടി, വേളാങ്കണ്ണി, തഞ്ചാവൂർ, ശ്രീരംഗം എന്നിവിടങ്ങളിലേക്കുള്ള തീർത്ഥാടകർക്ക് ഇത് ഏറെ ഉപകാരപ്പെടും.
മംഗളൂരു – താംബരം അമൃത് ഭാരത് എക്സ്പ്രസിൽ എട്ട് സ്ലീപ്പർ കോച്ചുകളും എട്ട് ജനറൽ കമ്പാർട്ട്മെന്റുകളും ഉണ്ടാകും. ചെന്നൈ ഭാഗത്തേക്ക് പോകുന്ന വിദ്യാർത്ഥികൾക്കും ഉദ്യോഗസ്ഥർക്കും കുറഞ്ഞ നിരക്കിൽ യാത്ര ചെയ്യാൻ ഈ ട്രെയിൻ സഹായിക്കും. നിലവിൽ വന്ദേഭാരത്, നാഗർകോവിൽ – മംഗളൂരു അമൃത് ഭാരത് എന്നീ ട്രെയിനുകൾക്ക് പിന്നാലെയാണ് പുതിയ രണ്ട് സർവീസുകൾ കൂടി എത്തുന്നത്.
