തിരുവനന്തപുരം: തലസ്ഥാന നഗരിയെ ഞെട്ടിച്ച് തൈക്കാട് വിദ്യാർത്ഥികൾ ഉൾപ്പെട്ട ഇരുവിഭാഗങ്ങൾ തമ്മിലുണ്ടായ തർക്കത്തെ തുടർന്ന് 19-കാരൻ കുത്തേറ്റു മരിച്ച സംഭവത്തിൽ, പ്രതികളുടെ അറസ്റ്റ് ഇന്ന് രേഖപ്പെടുത്തും. സംഭവവുമായി ബന്ധപ്പെട്ട് കാപ്പ കേസിൽ ഉൾപ്പെട്ട ഒരാൾ ഉൾപ്പെടെ പോലീസ് കസ്റ്റഡിയിലാണ്.(19-year-old was stabbed to death, arrest of the accused will be recorded today )
കൊല്ലപ്പെട്ടത് തമ്പാനൂർ തോപ്പിൽ വാടകയ്ക്ക് താമസിക്കുന്ന അലൻ എന്ന യുവാവാണ്. ഇന്നലെ വൈകിട്ട് 7 മണിയോടെയാണ് സംഭവം. തൈക്കാട് ഗ്രൗണ്ടിൽ നടന്ന ഫുട്‌ബോൾ മത്സരത്തിനിടെ ഇരു വിഭാഗങ്ങൾ തമ്മിലുണ്ടായ തർക്കത്തിന്റെ തുടർച്ചയാണ് കൊലപാതകത്തിൽ കലാശിച്ചത്.
സാക്ഷിമൊഴിയനുസരിച്ച്, പ്രതികൾ ഹെൽമെറ്റ് ഉപയോഗിച്ച് അലന്റെ തലയ്ക്ക് ശക്തമായി ഇടിക്കുകയും തുടർന്ന് കത്തി ഉപയോഗിച്ച് നെഞ്ചിൽ കുത്തുകയുമായിരുന്നു. സ്ഥലത്തെ സിസിടിവി ദൃശ്യങ്ങൾ പരിശോധിച്ചതിലൂടെയാണ് പ്രതികളെക്കുറിച്ച് പോലീസിന് നിർണായക സൂചനകൾ ലഭിച്ചത്. കസ്റ്റഡിയിലുള്ളവരുടെ അറസ്റ്റ് നടപടികൾ ഇന്ന് പൂർത്തിയാക്കും. മരിച്ച അലന്റെ മൃതദേഹം ഇന്ന് പോസ്റ്റ്‌മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും.