തിരുവനന്തപുരം: രാജ്യത്ത് ജനങ്ങളെ ഭിന്നിപ്പിച്ച് വെറുപ്പും വിദ്വേഷവും വളർത്തി രാഷ്ട്രീയ നേട്ടം കൊയ്യാൻ ശ്രമിക്കുന്നവരെ ഒറ്റക്കെട്ടായി പ്രതിരോധിക്കണമെന്ന് പ്രതിപക്ഷ നേതാവ് വി.ഡി. സതീശൻ. ഭാരതം പരമാധികാര റിപ്പബ്ലിക്കായതിന്റെ ഓർമ്മ പുതുക്കുന്ന ഈ ദിനത്തിൽ ഭരണഘടനാ മൂല്യങ്ങൾ സംരക്ഷിക്കാനുള്ള പ്രതിജ്ഞ പുതുക്കണമെന്നും അദ്ദേഹം റിപ്പബ്ലിക് ദിന സന്ദേശത്തിൽ ആഹ്വാനം ചെയ്തു.(We must unite to resist those who try to create division and gain political advantage, VD Satheesan in his Republic Day message)
മഹാത്മാ ഗാന്ധിയും ജവഹർലാൽ നെഹ്റുവും ഉൾപ്പെടെയുള്ള ധീര ദേശാഭിമാനികൾ തെളിച്ച വഴിയിലൂടെയാണ് ഇന്ത്യ മുന്നേറിയത്. നാനാത്വത്തിൽ ഏകത്വം എന്ന ആശയമാണ് ഈ രാജ്യത്തിന്റെ സൗന്ദര്യം. ജനങ്ങൾക്കിടയിൽ വിദ്വേഷം പടർത്തി നേട്ടമുണ്ടാക്കാൻ ശ്രമിക്കുന്ന ഭരണകൂടമാണ് ഇന്നത്തെ യാഥാർത്ഥ്യം. ഇത് രാജ്യത്തിന്റെ ഐക്യത്തിന് ഭീഷണിയാണെന്ന് അദ്ദേഹം ഫേസ്ബുക്ക് കുറിപ്പിൽ വ്യക്തമാക്കി.
നിരവധി പേരുടെ ജീവത്യാഗത്തിലൂടെ നേടിയെടുത്ത സ്വാതന്ത്ര്യവും അവകാശങ്ങളും സുരക്ഷിതമായി നിലനിർത്താൻ നാം ജാഗ്രത പാലിക്കണം. “ഭിന്നിപ്പിന്റെ രാഷ്ട്രീയത്തെ പ്രതിരോധിക്കാനുള്ള ദിനമാകട്ടെ ഇത്തവണത്തെ റിപ്പബ്ലിക് ദിനാഘോഷം” എന്ന് ആശംസിച്ചുകൊണ്ടാണ് അദ്ദേഹം തന്റെ സന്ദേശം അവസാനിപ്പിച്ചത്.
