തോപ്പുംപടി: നിയമസഭാ തിരഞ്ഞെടുപ്പിനുള്ള ആദ്യഘട്ട സ്ഥാനാർത്ഥി പട്ടികകൾ പുറത്തുവന്നിട്ടും കൊച്ചി മണ്ഡലത്തിൽ സ്ഥാനാർത്ഥികളെ പ്രഖ്യാപിക്കാനാവാതെ യു.ഡി.എഫും എൻ.ഡി.എയും പ്രതിസന്ധിയിൽ (Kochi assembly election 2026). അതേസമയം, സിറ്റിംഗ് എം.എൽ.എ കെ.ജെ. മാക്സിയെ തന്നെ രംഗത്തിറക്കി എൽ.ഡി.എഫ് പ്രചാരണരംഗത്ത് ബഹുദൂരം മുന്നിലെത്തിക്കഴിഞ്ഞു.
സ്ഥാനാർത്ഥി പ്രഖ്യാപനം വന്ന ഞായറാഴ്ച വൈകുന്നേരം തന്നെ മണ്ഡലത്തിൽ കെ.ജെ. മാക്സിയുടെ ബോർഡുകളും പോസ്റ്ററുകളും പ്രത്യക്ഷപ്പെട്ടു. ചൊവ്വാഴ്ച കുമ്പളങ്ങി മേഖലയിൽ പര്യടനം നടത്തിയ അദ്ദേഹം വ്യാപാരികളുമായും നാട്ടുകാരുമായും നേരിട്ട് സംവദിച്ചു. വിവിധ ആരാധനാലയങ്ങൾ സന്ദർശിച്ചും വോട്ടഭ്യർത്ഥിച്ചും മാക്സി രണ്ടാംഘട്ട പര്യടനത്തിലേക്ക് കടക്കുകയാണ്.
കോൺഗ്രസിന്റെ 55 അംഗ ആദ്യ പട്ടികയിൽ കൊച്ചി ഇടംപിടിച്ചില്ല. സ്ഥാനാർത്ഥി ഇല്ലാത്തതിനാൽ ചുവരുകൾ വെള്ളപൂശി ഇട്ടിരിക്കുകയാണ് കോൺഗ്രസ് പ്രവർത്തകർ. വോട്ടർ പട്ടിക ക്രമീകരണം പോലുള്ള സാങ്കേതിക ജോലികൾ പൂർത്തിയാക്കിയെങ്കിലും, പേര് പ്രഖ്യാപിക്കാത്തത് താഴെത്തട്ടിലെ ആവേശം ചോർത്തുന്നതായി പ്രവർത്തകർ പരാതിപ്പെടുന്നു.
ബി.ജെ.പി നേതൃത്വത്തിലുള്ള എൻ.ഡി.എയിലും സ്ഥാനാർത്ഥി പ്രഖ്യാപനം ആയിട്ടില്ല. കൊച്ചി സീറ്റ് ഇത്തവണ ഘടകകക്ഷിയായ ട്വന്റി 20-യ്ക്ക് നൽകാനാണ് സാധ്യതയെന്ന് സൂചനയുണ്ട്. ബൂത്ത് കമ്മിറ്റികൾ സജ്ജമാണെങ്കിലും ചുവരെഴുത്തുകൾക്കും മറ്റും സ്ഥാനാർത്ഥിയുടെ പേര് വരാൻ ബി.ജെ.പി നേതൃത്വവും കാത്തിരിക്കുകയാണ്.
സ്ഥാനാർത്ഥി നിർണ്ണയത്തിലെ താമസം തിരഞ്ഞെടുപ്പ് ഫലത്തെ ബാധിക്കുമോ എന്ന ആശങ്ക യു.ഡി.എഫ്, എൻ.ഡി.എ ക്യാമ്പുകളിൽ ശക്തമാണ്. വരും ദിവസങ്ങളിൽ സ്ഥാനാർത്ഥി പ്രഖ്യാപനം ഉണ്ടാകുന്നതോടെ കൊച്ചിയിൽ ശക്തമായ ത്രികോണ മത്സരം പ്രകടമാകും.
Story Summary:
The Kochi constituency is witnessing an early lead by the LDF in campaign efforts as sitting MLA K.J. Maxy has already begun roadshows and poster distributions. In contrast, both UDF and NDA are trailing due to delays in candidate announcements. While Congress’s first list of 55 names excluded Kochi, BJP is reportedly considering allotting the seat to its ally, Twenty20. UDF and NDA activists have prepared booths and whitewashed walls for campaigning but are unable to proceed further without official candidate names.
