കണ്ണൂർ: നിയമസഭാ തിരഞ്ഞെടുപ്പ് അടുത്തിരിക്കെ തളിപ്പറമ്പ് മണ്ഡലത്തിലെ സ്ഥാനാർത്ഥിത്വത്തെച്ചൊല്ലി സി.പി.എമ്മിൽ ഭിന്നത പുകയുന്നു (Taliparamba CPM Candidate 2026). നിലവിലെ എം.എൽ.എ എം.വി. ഗോവിന്ദന് പകരം അദ്ദേഹത്തിന്റെ ഭാര്യയും മുൻ ആന്തൂർ നഗരസഭാ അധ്യക്ഷയുമായ പി.കെ. ശ്യാമളയെ മത്സരിപ്പിക്കാനുള്ള നീക്കമാണ് വിവാദങ്ങൾക്ക് വഴിവെച്ചിരിക്കുന്നത്.
മുതിർന്ന നേതാക്കളുടെ ഭാര്യമാർക്ക് സീറ്റ് നൽകുന്നതിനെതിരെ കണ്ണൂർ ജില്ലാ സെക്രട്ടേറിയറ്റിൽ ഒരു വിഭാഗം രംഗത്തെത്തി. മുൻപ് എ. വിജയരാഘവന്റെയും എ.കെ. ബാലന്റെയും ഭാര്യമാരുടെ പേര് വന്നപ്പോഴുണ്ടായ തിരിച്ചടി ഇവർ ചൂണ്ടിക്കാട്ടുന്നു. എൻ. സുകന്യയുടെ പേരും പരിഗണനയിലുണ്ടെങ്കിലും എതിർപ്പ് ശക്തമാണ്.
തളിപ്പറമ്പ് മണ്ഡലം വനിതാ സംവരണമെന്ന മട്ടിൽ മാറ്റിവെച്ചത് ചില മുതിർന്ന പുരുഷ നേതാക്കളെ വെട്ടാനാണെന്ന ആക്ഷേപം ശക്തമാണ്. കഴിഞ്ഞ തവണ തർക്കം പരിഹരിക്കാനെന്ന പേരിൽ എം.വി. ഗോവിന്ദൻ വന്നതുപോലെ, ഇത്തവണയും ചിലർക്കായി ‘ഒത്തുകളി’ നടക്കുന്നുവെന്നാണ് എതിർപ്പുള്ളവരുടെ വാദം.
പയ്യന്നൂരിൽ ടി.ഐ. മധുസൂദനനെതിരെയുള്ള ആക്ഷേപങ്ങൾ അവഗണിച്ചതും, കാലങ്ങളായി പാർട്ടിക്കായി പ്രവർത്തിക്കുന്നവരെ തഴഞ്ഞ് നേതാക്കളുടെ ബന്ധുക്കളെ പ്രതിഷ്ഠിക്കുന്നതും താഴേത്തട്ടിലുള്ള പ്രവർത്തകരിൽ അമർഷമുണ്ടാക്കിയിട്ടുണ്ട്.
നേതൃത്വം ഏകപക്ഷീയമായ തീരുമാനവുമായി മുന്നോട്ടുപോയാൽ തളിപ്പറമ്പിൽ പരസ്യമായ പ്രതിഷേധങ്ങളുണ്ടാകുമെന്ന മുന്നറിയിപ്പും എതിർ വിഭാഗം നൽകുന്നുണ്ട്. പി.കെ. ശ്യാമളയെ ആന്തൂർ നഗരസഭാ അധ്യക്ഷയായിരുന്ന കാലത്തെ വിവാദങ്ങളും (സാജൻ കേസ് ഉൾപ്പെടെ) എതിരാളികൾ ആയുധമാക്കാൻ സാധ്യതയുണ്ടെന്ന് ഇവർ ചൂണ്ടിക്കാട്ടുന്നു.
Story Summary: Internal rift intensifies in CPI(M) over the selection of a successor for M.V. Govindan in the Taliparamba constituency. The proposal to field P.K. Shyamala, wife of Govindan, faces stiff opposition from a section of the district secretariat, citing nepotism. Some leaders allege that declaring Taliparamba as a ‘women-preferred’ seat is a tactical move to sideline senior male aspirants.
