ടെഹ്റാൻ: ഇറാൻ-ഇസ്രായേൽ യുദ്ധത്തിൽ തങ്ങളുടെ പൗരൻ കൊല്ലപ്പെട്ട വിവരം ചൈന ഔദ്യോഗികമായി സ്ഥിരീകരിച്ചു. ടെഹ്റാനിലുണ്ടായ സൈനികാക്രമണത്തിനിടയിലാണ് ഇദ്ദേഹം കൊല്ലപ്പെട്ടതെന്ന് ചൈനീസ് വിദേശകാര്യ വക്താവ് മാവോ നിംഗ് വ്യക്തമാക്കി. സുരക്ഷാ ഭീഷണി മുൻനിർത്തി മാർച്ച് 2 വരെ ഏകദേശം 3,000 ചൈനീസ് പൗരന്മാരെ ഇറാനിൽ നിന്ന് ഒഴിപ്പിച്ചു കഴിഞ്ഞു.(Iran and Israel strike back, Chinese citizen confirmed killed in Tehran)
അമേരിക്കൻ പ്രസിഡന്റ് ഡൊണാൾഡ് ട്രംപ് അടുത്തകാലത്തായി നടത്തിയ രണ്ട് നിർണ്ണായക നീക്കങ്ങൾ ചൈനയുടെ ഇന്ധന വിതരണ ശൃംഖലയെ ലക്ഷ്യം വെച്ചുള്ളതാണെന്ന് വിലയിരുത്തപ്പെടുന്നു. ജനുവരിയിൽ വെനസ്വേലൻ പ്രസിഡന്റ് നിക്കോളാസ് മഡുറോയെ പിടികൂടിയ നടപടി ചൈനയ്ക്ക് വലിയ തിരിച്ചടിയായി. ഇറാന്റെ പരമോന്നത നേതാവ് ആയത്തുള്ള അലി ഖമനേയിയുടെ വധത്തോടെ ചൈനയുടെ ഏറ്റവും അടുത്ത തന്ത്രപ്രധാന പങ്കാളികളിലൊരാളെയാണ് നഷ്ടമായത്.
ചൈനയുടെ എണ്ണ ഇറക്കുമതിയുടെ വലിയൊരു ഭാഗം ഈ രണ്ട് രാജ്യങ്ങളിൽ നിന്നായിരുന്നു. ഈ രാജ്യങ്ങളിലെ ഭരണമാറ്റവും അസ്ഥിരതയും ചൈനയുടെ സാമ്പത്തിക വളർച്ചയെ നേരിട്ട് ബാധിക്കുമെന്നതിനാൽ, ബീജിംഗ് ഈ പ്രതിസന്ധിയെ എങ്ങനെ മറികടക്കുമെന്നാണ് ആഗോള വിപണി ഉറ്റുനോക്കുന്നത്. യുദ്ധം മൂന്നാം ദിവസത്തിലേക്ക് കടന്നതോടെ ഇറാനിൽ ആശയവിനിമയ സംവിധാനങ്ങൾ തകരാറിലായതായി നെറ്റ്ബ്ലോക്ക്സ് റിപ്പോർട്ട് ചെയ്തു.
കഴിഞ്ഞ 48 മണിക്കൂറിലധികമായി രാജ്യത്ത് ഇന്റർനെറ്റ് സേവനങ്ങൾ മന്ദഗതിയിലാണ്. ജനുവരിയിലെ പ്രതിഷേധകാലത്തെപ്പോലെ പൂർണ്ണമായി വിച്ഛേദിച്ചിട്ടില്ലെങ്കിലും ഓൺലൈൻ ആക്സസ് പരിമിതമാണ്. സൈനിക നീക്കങ്ങൾ രഹസ്യമായി സൂക്ഷിക്കുന്നതിനും അഭ്യൂഹങ്ങൾ പടരുന്നത് തടയുന്നതിനുമാണ് ഇറാൻ ഇന്റർനെറ്റ് നിയന്ത്രിക്കുന്നതെന്നാണ് കരുതപ്പെടുന്നത്.
