കൊച്ചി: മലയാള സിനിമയിലെ നിർമ്മാതാക്കൾ നേരിടുന്ന ചൂഷണങ്ങളെയും ചതിക്കുഴികളെയും തുറന്നുകാട്ടി പ്രമുഖ നിർമ്മാതാവ് വേണു കുന്നപ്പിള്ളി. ‘സുമതി വളവ്’ എന്ന ചിത്രത്തിന്റെ നിർമ്മാതാവ് മുരളി കുന്നുംപുറം കഴിഞ്ഞ ദിവസം നടത്തിയ വെളിപ്പെടുത്തലുകളോട് പ്രതികരിക്കുകയായിരുന്നു അദ്ദേഹം. ആ സിനിമയുമായി മുന്നോട്ട് പോകരുതെന്ന് മുരളിയെ താൻ നേരത്തെ ഉപദേശിച്ചിരുന്നുവെന്നും എന്നാൽ സംവിധായകന്റെയും എഴുത്തുകാരന്റെയും പ്രലോഭനങ്ങളിൽ അദ്ദേഹം വീണുപോയെന്നും വേണു കുന്നപ്പിള്ളി തന്റെ ഫേസ്ബുക്ക് കുറിപ്പിൽ വ്യക്തമാക്കി.
വർഷങ്ങൾക്ക് മുൻപ് തന്നെ താൻ ഈ സിനിമയുടെ കഥ കേട്ടിരുന്നതാണെന്ന് വേണു പറയുന്നു. ദുബായിൽ വെച്ച് മുരളിയെ കണ്ടപ്പോൾ ഈ പ്രോജക്റ്റിൽ നിന്ന് പിന്മാറണമെന്ന് താൻ ആവശ്യപ്പെട്ടിരുന്നു. സീരിയൽ നിലവാരമുള്ള കഥയുമായി ഇത്ര വലിയ തുക മുടക്കി സിനിമ ചെയ്യുന്നത് നഷ്ടമാകുമെന്ന് താൻ തിരിച്ചറിഞ്ഞു. 5-6 കോടി രൂപയിൽ ഒതുങ്ങേണ്ട ഒരു കഥയ്ക്ക് ഏകദേശം 15 കോടിയോളം രൂപയാണ് നിർമ്മാതാവ് മുടക്കിയത്. റിലീസ് ചെലവുകൾ കൂടി ചേർത്തപ്പോൾ ഇത് 20 കോടിക്ക് മുകളിലെത്തിയെന്നും വേണു കുന്നപ്പിള്ളി ചൂണ്ടിക്കാട്ടി.
ചിത്രത്തിന്റെ റിലീസിന് മുൻപേ താൻ സിനിമ കണ്ടിരുന്നുവെന്നും ആ നിലവാരം കണ്ട് ഭയന്നുപോയെന്നും അദ്ദേഹം കുറിച്ചു. “സിനിമ കണ്ടപ്പോൾ ഞാൻ തലയിൽ കൈവെച്ചുപോയി. പ്രീ-ബിസിനസ് നടക്കാതെ തിയേറ്ററിലേക്ക് പോകരുതെന്ന് താൻ നിർമ്മാതാവിനോട് പറഞ്ഞിരുന്നു. ഒടുവിൽ ഗോകുലം മൂവീസ് ഒരു രക്ഷകനെപ്പോലെ എത്തിയതുകൊണ്ടാണ് സിനിമ വെളിച്ചം കണ്ടത്,” വേണു വ്യക്തമാക്കുന്നു.
സിനിമയിലെ ‘അഹങ്കാരികളായ’ അണിയറപ്രവർത്തകർ നിർമ്മാതാക്കളുടെ പണം കൊണ്ട് അഹങ്കാരത്തിന്റെ അത്യുന്നതങ്ങളിൽ വിഹരിക്കുന്ന ഒരു കൂട്ടം ആൾക്കാർ സിനിമയിലുണ്ടെന്ന് വേണു കുന്നപ്പിള്ളി കടുത്ത ഭാഷയിൽ വിമർശിച്ചു. പറഞ്ഞ ബജറ്റിന്റെ ഇരട്ടിയിലധികം പണം ചെലവാക്കുമ്പോഴും യാതൊരു കുലുക്കവുമില്ലാത്ത സംവിധായകരെയും എഴുത്തുകാരെയും സിനിമയിൽ നിന്ന് അകറ്റിനിർത്തണം. ആർട്ടിസ്റ്റുകൾക്ക് കുട പിടിക്കാൻ പോലും യോഗ്യതയില്ലാത്തവർ സംവിധായകരായി ചമയുന്നത് സിനിമയ്ക്ക് ശാപമാണെന്നും അദ്ദേഹം പറഞ്ഞു.
നിർമ്മാതാക്കൾ ആത്മഹത്യയുടെ മുനമ്പിലെത്തുന്നത് സിനിമയിലെ ഒറ്റപ്പെട്ട സംഭവമല്ലെന്നും, പലരും മാനഹാനി ഭയന്നാണ് പുറത്തുപറയാത്തതെന്നും വേണു കുന്നപ്പിള്ളി കൂട്ടിച്ചേർത്തു. സിനിമ അസോസിയേഷനുകൾ ഈ വിഷയത്തിൽ എപ്പോഴാണ് കണ്ണുതുറക്കുക എന്ന ചോദ്യത്തോടെയാണ് അദ്ദേഹം തന്റെ കുറിപ്പ് അവസാനിപ്പിക്കുന്നത്.
Story Summary: Venu Kunnappilly reacts to producer Murali Kunnumpuram’s revelations about the movie ‘Sumathi Valavu,’ stating he had warned Murali against the project due to its poor script. He criticizes the lack of ethics in the film industry, where producers are often misled into spending double the budget by incompetent directors and writers.
