ഏതൻസ്: ലോകപ്രശസ്ത ഇസ്രയേലി സ്പൈ ത്രില്ലർ സീരീസ് ‘ടെഹ്റാൻ’ നിർമാതാവ് ഡാന ഏഡനെ ഗ്രീസിന്റെ തലസ്ഥാനമായ ഏതൻസിലെ ഹോട്ടൽ മുറിയിൽ മരിച്ച നിലയിൽ കണ്ടെത്തി. ഇസ്രയേലി പൊതു പ്രക്ഷേപണ മാധ്യമമാണ് ഈ വിവരം പുറത്തുവിട്ടത്. സീരീസിന്റെ നാലാം സീസണിന്റെ ചിത്രീകരണവുമായി ബന്ധപ്പെട്ട് ഏതൻസിൽ എത്തിയതായിരുന്നു അവർ.(Tehran series creator Dana Eden mysteriously found dead in Athens hotel room)
ഇസ്രയേൽ-ഇറാൻ പശ്ചാത്തലത്തിലുള്ള സീരീസിന്റെ നിർമാതാവായതിനാൽ, മരണത്തിന് പിന്നിൽ ഇറാൻ രഹസ്യാന്വേഷണ ഏജൻസികൾക്ക് പങ്കുണ്ടെന്ന തരത്തിലുള്ള പ്രചാരണങ്ങൾ സമൂഹമാധ്യമങ്ങളിൽ ഉയർന്നിരുന്നു. എന്നാൽ ഇത്തരം അഭ്യൂഹങ്ങളെ ഗ്രീക്ക് പോലീസും ഡാനയുടെ നിർമാണ കമ്പനിയായ ‘ഡോള ആൻഡ് ഷൂല’യും തള്ളിക്കളഞ്ഞു.
മരണത്തിൽ അസ്വാഭാവികതയോ ക്രിമിനൽ ഗൂഢാലോചനയോ ഉള്ളതായി പ്രാഥമിക പരിശോധനയിൽ കണ്ടെത്തിയിട്ടില്ലെന്നും ആത്മഹത്യയാണെന്നാണ് സൂചനയെന്നും അധികൃതർ വ്യക്തമാക്കി. മരണകാരണം സ്ഥിരീകരിക്കാൻ പോസ്റ്റ്മോർട്ടം നടപടികൾ തുടരുകയാണ്.
