Follow on Google News
കൊച്ചി: 2022-ൽ പുറത്തിറങ്ങി വലിയ ചർച്ചയായ ‘ജനഗണമന’യ്ക്ക് രണ്ടാം ഭാഗമുണ്ടാകുമെന്ന് ചിത്രത്തിന്റെ നിർമ്മാതാവ് കൂടിയായ പൃഥ്വിരാജ് സ്ഥിരീകരിച്ചു (Jana Gana Mana 2 Sequel Update). ആദ്യ ഭാഗത്തിന്റെ ചിത്രീകരണ വേളയിൽ തന്നെ തിരക്കഥാകൃത്ത് ഷാരിസ് മുഹമ്മദും സംവിധായകൻ ഡിജോയും ഇതിന്റെ ആശയങ്ങൾ തന്നോട് പങ്കുവെച്ചിരുന്നുവെന്ന് താരം വ്യക്തമാക്കി.
ജനഗണമനയുടെ രണ്ടാം ഭാഗം എന്നതിലുപരി താൻ അവതരിപ്പിച്ച ‘അരവിന്ദ് സ്വാമിനാഥൻ’ എന്ന കഥാപാത്രത്തിന്റെ കഥയുടെ തുടർച്ച എന്ന നിലയിലാണ് പുതിയ ഐഡിയ പങ്കുവെച്ചത്. വെറും പത്ത് മിനിറ്റ് കൊണ്ട് അവർ തന്നോട് പറഞ്ഞ കഥാതന്തു അങ്ങേയറ്റം രസകരമായി തോന്നി. ഇനി അത് തിരക്കഥയായി പൂർത്തിയാക്കേണ്ടതുണ്ട്. താൻ സംവിധാനം ചെയ്ത ചിത്രമല്ലാത്തതിനാൽ അവർ ആവശ്യമായ തയ്യാറെടുപ്പുകൾ പൂർത്തിയാക്കിയാൽ മാത്രമേ തുടർപ്രവർത്തനങ്ങൾ ഉണ്ടാകൂ എന്നും പൃഥ്വി കൂട്ടിച്ചേർത്തു.
ജനഗണമന രണ്ടാം ഭാഗത്തിന്റെ പണികൾ നടന്നുവരികയാണെന്ന് സംവിധായകൻ ഡിജോ ജോസ് ആന്റണിയും വ്യക്തമാക്കി. പൃഥ്വിരാജിന്റെ കരിയറിലെ തന്നെ ഏറ്റവും മികച്ച പ്രകടനങ്ങളിലൊന്നായിരുന്നു ജനഗണമനയിലേത്. ആദ്യ ഭാഗത്തിന്റെ അവസാനം നൽകിയ സൂചനകൾ രണ്ടാം ഭാഗത്തിന് വലിയ പ്രതീക്ഷയാണ് പ്രേക്ഷകർക്കിടയിൽ നൽകിയിരിക്കുന്നത്.
പൃഥ്വിരാജ് സുകുമാരൻ, സുരാജ് വെഞ്ഞാറമൂട് എന്നിവർ തകർത്തഭിനയിച്ച ആദ്യ ഭാഗം ബോക്സ് ഓഫീസിലും വലിയ വിജയം നേടിയിരുന്നു. രണ്ടാം ഭാഗം എപ്പോൾ ആരംഭിക്കുമെന്ന കാര്യത്തിൽ വരും ദിവസങ്ങളിൽ കൂടുതൽ വ്യക്തതയുണ്ടാകും.
Story Summary: Actor Prithviraj Sukumaran confirmed the sequel to his superhit movie ‘Jana Gana Mana’. Speaking at the press meet of ‘Pallichattambi’, he revealed that the story will focus on the character Adv. Aravind Swaminathan and director Dijo Jose Antony is working on it.
