ലോസ് ഏഞ്ചൽസ്: പ്രശസ്ത ഹോളിവുഡ് നടൻ റോബർട്ട് കരാഡിനെ (71) മരിച്ച നിലയിൽ കണ്ടെത്തി (Robert Carradine Death). രണ്ട് പതിറ്റാണ്ടോളമായി തന്നെ അലട്ടിയിരുന്ന ബൈപോളാർ ഡിസോർഡർ എന്ന മാനസികാവസ്ഥയോടുള്ള നീണ്ട പോരാട്ടത്തിനൊടുവിൽ അദ്ദേഹം സ്വയം ജീവനൊടുക്കുകയായിരുന്നുവെന്ന് കുടുംബം ഔദ്യോഗികമായി സ്ഥിരീകരിച്ചു. മാനസികരോഗങ്ങളുമായി ബന്ധപ്പെട്ട സാമൂഹികമായ അകറ്റിനിർത്തലുകൾ അവസാനിപ്പിക്കാനാണ് അദ്ദേഹത്തിന്റെ മരണകാരണം പരസ്യമാക്കാൻ തീരുമാനിച്ചതെന്ന് കുടുംബം വ്യക്തമാക്കി.
1972-ൽ ജോൺ വെയ്നിനൊപ്പം ‘ദ കൗബോയ്സ്’ എന്ന ചിത്രത്തിലൂടെയായിരുന്നു തുടക്കം. 1984-ലെ ‘റിവെഞ്ച് ഓഫ് ദി നേർഡ്സ്’ എന്ന ചിത്രത്തിലെ ലൂയിസ് സ്കോൾനിക്ക് എന്ന കഥാപാത്രം അദ്ദേഹത്തെ ആഗോള പ്രശസ്തനാക്കി. ഡിസ്നിയുടെ ‘ലിസി മക്ഗുയർ’ പരമ്പരയിലെ അച്ഛൻ വേഷത്തിലൂടെ പുതിയ തലമുറയ്ക്കും അദ്ദേഹം പ്രിയങ്കരനായി.സഹോദരങ്ങളായ ഡേവിഡ്, കീത്ത് എന്നിവരോടൊപ്പം ‘ദ ലോങ് റൈഡേഴ്സ്’ ഉൾപ്പെടെയുള്ള ചിത്രങ്ങളിൽ അദ്ദേഹം വേഷമിട്ടിട്ടുണ്ട്.
2009-ൽ സഹോദരൻ ഡേവിഡ് കരാഡിന്റെ ആകസ്മിക മരണമാണ് റോബർട്ടിൽ ബൈപോളാർ ഡിസോർഡർ പ്രകടമാകാൻ കാരണമായത്. തുടർന്ന് വലിയ മാനസിക സംഘർഷങ്ങളിലൂടെയാണ് അദ്ദേഹം കടന്നുപോയത്. 2015-ൽ ഒരു വാഹനാപകടത്തിലൂടെ സ്വയം ജീവനൊടുക്കാൻ ശ്രമിച്ചതായും അദ്ദേഹം വെളിപ്പെടുത്തിയിരുന്നു. മാനസികാരോഗ്യത്തെക്കുറിച്ചുള്ള ബോധവൽക്കരണം ലക്ഷ്യമിട്ടാണ് അദ്ദേഹത്തിന്റെ സഹോദരനും നടനുമായ കീത്ത് കരാഡിൻ ഉൾപ്പെടെയുള്ളവർ ഈ വിവരം ലോകത്തെ അറിയിച്ചത്.
Story Summary: Hollywood actor Robert Carradine, known for ‘Revenge of the Nerds’ and ‘Lizzie McGuire’, passed away at 71. His family confirmed he died by suicide after a long battle with bipolar disorder. They released the statement to raise awareness about mental health and break the social stigma.
