ചെന്നൈ: തമിഴ് ടെലിവിഷൻ താരം സുഭാഷിണിയുടെ അപ്രതീക്ഷിത വിയോഗത്തിൽ വേദനയോടെ ഭർത്താവ് ബിബിൻ ചന്ദ്ര (Actress Subhashini Death News). പ്രിയതമയുടെ മരണവാർത്ത വിശ്വസിക്കാനാകുന്നില്ലെന്നും ഇനിയും ഒരുപാട് ഓർമ്മകൾ ബാക്കിവെച്ചാണ് അവൾ പോയതെന്നും ബിബിൻ ഇൻസ്റ്റാഗ്രാമിൽ കുറിച്ചു. കഴിഞ്ഞ ഏപ്രിൽ ആറിനാണ് ചെന്നൈയിലെ വീട്ടിൽ സുഭാഷിണിയെ മരിച്ച നിലയിൽ കണ്ടെത്തിയത്.
ഹൃദയഭേദകമായ കുറിപ്പ്:
“എന്റെ സ്നേഹം, എന്റെ ബൊബ്ബ… നിന്നെപ്പോലെ മറ്റാരും എനിക്ക് ഇത്രയും സ്നേഹം നൽകിയിട്ടില്ല. നിന്നെയല്ലാതെ മറ്റാരെയും ഞാൻ ഇത്രമേൽ സ്നേഹിച്ചിട്ടുമില്ല. നീ ഇനിയില്ലെന്ന് വിശ്വസിക്കാൻ എനിക്ക് കഴിയുന്നില്ല. നീ എന്റെ ഓർമ്മകളിൽ ജീവിക്കുന്നു… എന്തിനാണ് എന്നെ വിട്ടുപോയത്?” ബിബിൻ ചോദിക്കുന്നു. ഒരുമിച്ച് യാത്ര ചെയ്യാനും കുഞ്ഞിനെക്കുറിച്ചുള്ള സ്വപ്നങ്ങൾ പങ്കുവെക്കാനും വിവാഹവാർഷികം ആഘോഷിക്കാനും താൻ ആഗ്രഹിച്ചിരുന്നുവെന്നും ഇനിയും ഒരുപാട് സ്വപ്നങ്ങൾ ബാക്കിയാണെന്നും അദ്ദേഹം കൂട്ടിച്ചേർത്തു.
ഞായറാഴ്ച രാത്രി ഭർത്താവുമായി വീഡിയോ കോളിൽ സംസാരിക്കുന്നതിനിടെയുണ്ടായ തർക്കമാണ് ആത്മഹത്യയിലേക്ക് നയിച്ചതെന്നാണ് പോലീസിന്റെ പ്രാഥമിക നിഗമനം. കുടുംബപ്രശ്നങ്ങളെച്ചൊല്ലിയുള്ള വഴക്കിനിടെ സുഭാഷിണി തൂങ്ങിമരിക്കാൻ ശ്രമിക്കുകയായിരുന്നു. വീഡിയോ കോളിലൂടെ ഇത് കണ്ട ബിബിൻ ഉടൻ തന്നെ അപ്പാർട്ട്മെന്റിലെ സുരക്ഷാ ജീവനക്കാരനെ വിവരം അറിയിച്ചു. സുരക്ഷാ ജീവനക്കാരൻ പോരൂർ പോലീസിനെ വിവരമറിയിച്ചെങ്കിലും പോലീസ് എത്തുമ്പോഴേക്കും മരണം സംഭവിച്ചിരുന്നു.
ശ്രീലങ്കയിൽ ജനിച്ച സാസ്വി ബാല എന്ന സുഭാഷിണി 2012-ൽ ‘അവൻ’ എന്ന തമിഴ് സിനിമയിലൂടെയാണ് അഭിനയരംഗത്തെത്തിയത്. സൺ ടിവിയിലെ ‘കയൽ’ എന്ന ജനപ്രിയ പരമ്പരയിലൂടെയാണ് താരം പ്രേക്ഷകർക്കിടയിൽ ശ്രദ്ധേയയായത്. ഹ്രസ്വചിത്രങ്ങളിലും ശ്രദ്ധേയമായ വേഷങ്ങൾ ചെയ്തിട്ടുണ്ട്. ബംഗളൂരു സ്വദേശിയായ ബിബിൻ ചന്ദ്രയുമായി രണ്ട് വർഷം മുൻപായിരുന്നു സുഭാഷിണിയുടെ വിവാഹം.
(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസിക സമ്മർദ്ദമുണ്ടായാൽ സഹായത്തിനായി ബന്ധപ്പെടുക: അതിജീവനം ഹെൽപ്പ്ലൈൻ – 9152987821)
Story Summary:
Bibin Chandra, husband of the late Tamil actress Subhashini (Sasvi Bala), shared an emotional Instagram post expressing his grief over her sudden demise. Subhashini was found dead at her Chennai apartment on April 6. According to police, she died by suicide while on a video call with her husband following a domestic dispute. Despite Bibin’s immediate efforts to alert security, the actress had passed away by the time help arrived. Subhashini was well-known for her role in the popular TV series ‘Kayal’.
