ലിവർപൂൾ: യുവേഫ ചാന്പ്യൻസ് ലീഗ് ഫുട്ബോളിലെ പ്രാഥമിക റൗണ്ട് മത്സരത്തിൽ നിലവിലെ ചാന്പ്യൻമാരായ റയൽ മാഡ്രിഡിനെ തോൽപ്പിച്ച് ലിവർപൂൾ എഫ്.സി. എതിരില്ലാത്ത രണ്ട് ഗോളുകൾക്കാണ് ലിവർപൂൾ വിജയിച്ചത്. ലിവർപൂളിന്‍റെ ഹോം ഗ്രൗണ്ടായ ആൻഫീൽ‌ഡിലാണ് മത്സരം നടന്നത്. (UEFA Champions League)
അലക്സിസ് മക് അലിസ്റ്ററും, കോഡി ഗാക്പോയും ആണ് ലിവർപൂളിനായി ഗോളുകൾ നേടിയത്. 52-ാം മിനിറ്റിൽ മക് അലിസ്റ്റർ ആണ് ആദ്യം ഗോൾ നേടിയത്. കോഡി ഗൗക്പോ മത്സരത്തിന്‍റെ 76-ാം മിനിറ്റിലാണ് ഗോൾ സ്കോർ ചെയ്തത്. വിജയത്തോടെ ചാന്പ്യൻസ് ലീഗ് പ്രാഥമിക റൗണ്ടിന്‍റെ പോയിന്‍റ് ടേബിളിൽ ലിവർപൂൾ ഒന്നാം സ്ഥാനം നിലനിർത്തി. അഞ്ച് മത്സരങ്ങളിൽ നിന്ന് 15 പോയിന്‍റാണ് ലിവർപൂളിനുള്ളത്.