ന്യൂഡൽഹി: വയനാട് ലോക്സഭാമണ്ഡലത്തിലെ നിയുക്ത എംപി പ്രിയങ്ക ഗാന്ധിയുടെ സത്യപ്രതിജ്ഞ ഇന്ന്. രാവിലെ 11നാണ് സത്യപ്രതിജ്ഞ ചടങ്ങ് നടക്കുക. പ്രിയങ്കയ്ക്കൊപ്പം മഹാരാഷ്‌ട്രയിൽ നിന്ന് ഉപതെരഞ്ഞെടുപ്പിൽ വിജയിച്ച കോണ്ഗ്രസ് എംപി രവീന്ദ്ര വസന്ത്റാവു ചവാനും ഇന്നു സത്യപ്രതിജ്ഞ ചെയ്യും. (Priyanka Gandhi Vadra)
സത്യപ്രതിജ്ഞയ്ക്കുശേഷം ലോക്സഭയിൽ പ്രിയങ്ക ഗാന്ധി ആദ്യമുന്നയിക്കുക വയനാട് ഉരുൾപൊട്ടൽ വിഷയമായിരിക്കുമെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ അറിയിച്ചു. സഭ ചേരുന്നതിനുമുന്പ് രാവിലെ 10.30ന് കോണ്ഗ്രസ് പാർലമെന്‍ററി പാർട്ടി ഓഫീസിൽ കോണ്ഗ്രസ് എംപിമാർ കൂടിക്കാഴ്ച നടത്തും. വയനാട് ദുരന്തനിവാരണ പാക്കേജ് വൈകുന്നത് പ്രിയങ്ക ലോക്സഭയിലെ തന്‍റെ കന്നി പ്രസംഗത്തിൽ ചോദ്യം ചെയ്യുമെന്ന് കെ.സി. വേണുഗോപാൽ പറഞ്ഞു.