വാഷിങ്ടൺ: അമേരിക്കയുടെ നാൽപത്തിയേഴാമത്തെ പ്രസിഡൻറായി സത്യപ്രതിജ്ഞ ചെയ്ത് ഡോണൾഡ് ട്രംപ്. കാപ്പിറ്റോൾ മന്ദിരത്തിലായിരുന്നു സത്യപ്രതിജ്ഞാ ചടങ്ങുകൾ നടന്നത്. ലോകനേതാക്കളുടെയും വമ്പൻ വ്യവസായികളുടെയും സാന്നിധ്യത്തിലായിരുന്നു സ്ഥാനാരോഹണ ചടങ്ങ് നടന്നത്.
മുൻ പ്രസിഡൻറ് ജോ ബൈഡന്റെ ചായ സൽക്കാരത്തിന് ശേഷമാണ് ട്രംപ് സത്യപ്രതിജ്ഞാ ചടങ്ങിന് വന്നത്. ജോ ബൈഡനും മുൻ വൈസ് പ്രസിഡൻറ് കമലാ ഹാരിസടക്കമുള്ളവർ ചടങ്ങിൽ സന്നിഹിതരായിരുന്നു.
ബൈബിളിൽ തൊട്ടായിരുന്നു ട്രംപ് സത്യവാചകം ചൊല്ലിയത്. യുഎസ് സുപ്രിംകോടതി ജഡ്ജി സത്യപ്രതിജ്ഞാ വാചകങ്ങൾ ചൊല്ലിക്കൊടുത്തു.