ഡൽഹി: ഭരണഘടനയുടെ മൂല്യങ്ങൾ ഉയർത്തിപ്പിടിക്കാൻ ഭാരതീയ ജനതാ പാർട്ടി (ബിജെപി) സ്വീകരിച്ച നടപടികളും, വർഷങ്ങളായി കോൺഗ്രസ് ഭരണഘടനയെ എങ്ങനെയെല്ലാം മുറിവേല്‍പ്പിച്ചു എന്നതിൻ്റെ ഉദാഹരണങ്ങളും ലോക്സഭയിൽ അക്കമിട്ട് നിരത്തി പ്രധാനമന്ത്രി നരേന്ദ്ര മോദിയുടെ പ്രസംഗം. 'കോൺഗ്രസിൻ്റെ ഒരു കുടുംബം ഭരണഘടനയെ തകർത്തു. ഞാൻ ഒരു കുടുംബത്തെ പരാമർശിക്കുന്നു, എന്തെന്നാൽ 75 വർഷത്തിൽ ഒരു കുടുംബം മാത്രമേ 55 വർഷമായി ഭരിച്ചിരുന്നുള്ളൂ. കുടുംബത്തിൻ്റെ മോശമായ ചിന്തകളും നയങ്ങളുമാണ് മുന്നോട്ട് കൊണ്ടുപോയത്'- മോദി പറഞ്ഞു.
'ഭരണഘടന മാറ്റുന്നത് അവരുടെ ശീലമാക്കി. ഭരണഘടനയെ അവർ വീണ്ടും വീണ്ടും ആക്രമിച്ചു. 75 തവണ ഭരണഘടനയിൽ മാറ്റങ്ങൾ വരുത്തി' പ്രധാനമന്ത്രി വിമർശിച്ചു.
ഭരണഘടനാ വ്യവസ്ഥകൾ ഇല്ലാതാക്കി അടിയന്തരാവസ്ഥ അവതരിപ്പിച്ചു. പൗരന്മാരുടെ അവകാശങ്ങൾ കൈവശപ്പെടുത്തി. കോൺഗ്രസിന്റെ നെറ്റിയിലെ ഈ കളങ്കം ഒരിക്കലും കഴുകിക്കളയാൻ കഴിയില്ല. ഇത് ജനാധിപത്യത്തിന്റെ കഴുത്തുഞെരിച്ചു. രാജ്യത്തിൻ്റെ ചരിത്രത്തിലെ കറുത്ത അധ്യായമായിരുന്നു അത്. ജനങ്ങൾ ഒരിക്കലും ഇവരോട് പൊറുക്കില്ലെന്നും പ്രധാനമന്ത്രി പറഞ്ഞു. ഇന്ത്യൻ ഭരണഘടന അംഗീകരിച്ചതിന്റെ 75-ാം വാർഷികത്തിന്റെ സ്മരണയ്ക്കായി, 'ഭരണഘടനയുടെ 75 വർഷത്തെ മഹത്തായ യാത്രയെക്കുറിച്ചുള്ള ചർച്ച' എന്ന വിഷയത്തിൽ ലോക്‌സഭ വെള്ളിയാഴ്ചയാണ് രണ്ട് ദിവസത്തെ ചർച്ചയ്ക്ക് തുടക്കം കുറിച്ചത്.
'രാഷ്ട്രീയ ദുരുപയോഗം ആരംഭിച്ചത് നെഹ്റുവാണ്. വ്യക്തിപരമായ താൽപര്യത്തിന് ഭരണഘടന ഭേദഗതി ചെയ്തു. 75 തവണ ഭരണഘടനയിൽ വെള്ളം ചേർത്തു. നെഹ്റു ആരംഭിച്ചത് ഇന്ദിര തുടർന്നു. കസേര സംരക്ഷിക്കാനാണ് ഇന്ദിര രാജ്യത്ത് അടിയന്തരാവസ്ഥ പ്രഖ്യാപിച്ചത്. സർക്കാരിനെക്കാൾ പ്രധാനം പാർട്ടിയാണെന്ന് മൻമോഹൻ സിംഗ് പറഞ്ഞു. മൻമോഹൻ സിംഗിന്റെ ഭരണകാലത്ത് സോണിയ ഗാന്ധി സൂപ്പർ പി എം കളിച്ചു. ഭരണഘടനയെ കോൺഗ്രസ് നോക്കുകുത്തിയാക്കിമാറ്റി. ഭരണഘടന ശിൽപികളെ അവർ അപമാനിച്ചു. നെഹ്റു കടുത്ത സംവരണ വിരോധിയായിരുന്നു . മണ്ഡൽ കമ്മിഷനെ കോൺഗ്രസ് എതിർത്തിരുന്നു. വോട്ടുബാങ്കിനായി സംവരണം അട്ടിമറിച്ചു. ഒബിസി സംവരണം നടപ്പാക്കാതിരിക്കാൻ കോൺഗ്രസ് ശ്രമിച്ചു',- മോദി ആരോപിച്ചു.
സ്വാതന്ത്ര്യം സ്വന്തമാക്കിയ സമയത്ത് ഉന്നയിക്കപ്പെട്ട എല്ലാ നിഷേധാത്മക സാധ്യതകളെയും നിരാകരിച്ചുകൊണ്ട് ഇന്ത്യൻ ഭരണഘടന നമ്മെ വളരെയധികം മുന്നോട്ട് കൊണ്ടുപോയി. പരീക്ഷയിൽ വിജയിച്ചതിന് പൗരന്മാർ അഭിനന്ദനം അർഹിക്കുന്നു. രാജ്യം ഇപ്പോൾ ജനാധിപത്യത്തിൻ്റെ മാതാവായാണ് അറിയപ്പെടുന്നത്. നമ്മൾ ജനാധിപത്യത്തിന് ജന്മം നൽകി. ഇന്ത്യ ലോക ജനാധിപത്യത്തിൻ്റെ മാതാവാണ് .
പാർലമെൻ്റിലും മന്ത്രി സഭയിലും വനിതാ അംഗങ്ങളുടെ എണ്ണം വർധിക്കുകയാണ് . സ്‌പോർട്‌സ്, വിദ്യാഭ്യാസം തുടങ്ങി എല്ലാ മേഖലകളിലും സ്ത്രീ പ്രാതിനിധ്യം മാതൃകാപരമാണ്. ബഹിരാകാശ സാങ്കേതികവിദ്യയിൽ സ്ത്രീകളുടെ പങ്ക് ഓരോ ഇന്ത്യക്കാരനും അംഗീകരിച്ചിട്ടുണ്ട്. വികസനത്തിൻ്റെ കേന്ദ്രം സ്ത്രീകളാണ്. ഭരണഘടനയാണ് ഇതിൻ്റെ അടിസ്ഥാനം.
സ്വാതന്ത്ര്യാനന്തരം, സ്വാർത്ഥതാൽപ്പര്യങ്ങൾ കാരണം , ഏറ്റവും ക്രൂരമായ ആക്രമണം രാജ്യത്തിൻ്റെ ഐക്യത്തിന് നേരെയായിരുന്നു. നാനാത്വത്തെ ആഘോഷിക്കുന്നതിനുപകരം, അടിമത്തത്തിൻ്റെ ചിന്താഗതി വളർത്തിയെടുത്ത ആളുകൾ, നമ്മുടെ വൈവിധ്യത്തിലെ വ്യത്യാസങ്ങൾ തേടി പോയി. രാജ്യത്തിൻ്റെ ഐക്യം ഇല്ലാതാക്കാൻ അവർ വിദ്വേഷത്തിൻ്റെ വിത്ത് പാകി. വൈവിധ്യങ്ങളെ നാം ആഘോഷിക്കേണ്ടതുണ്ട്.
രാജ്യം ഭരണഘടനയുടെ 50 വർഷം പിന്നിട്ടപ്പോൾ, ഭരണഘടനാ വ്യവസ്ഥകൾ ഇല്ലാതാക്കി അടിയന്തരാവസ്ഥ കൊണ്ടുവന്നു. പൗരന്മാരുടെ അവകാശങ്ങൾ മോഷ്ടിച്ചെടുത്തു. കോൺഗ്രസിന് നെറ്റിയിലെ ഈ കളങ്കം ഒരിക്കലും കഴുകിക്കളയാൻ സാധിക്കില്ല. അത് ജനാധിപത്യത്തെ കഴുത്തുഞെരിച്ചു. രാജ്യത്തിൻ്റെ ചരിത്രത്തിലെ കറുത്ത അധ്യായമായിരുന്നു അത്. ഇവരോട് ജനങ്ങൾ പൊറുക്കില്ലെന്ന് അദ്ദേഹം പറഞ്ഞു.