പാലക്കാട്: ഉപതെരഞ്ഞെടുപ്പിൽ തോൽവി നേരിട്ടതിന് ഇടത് സ്വതന്ത്രൻ പി സരിനെ ഏതെങ്കിലും തരത്തിൽ തളർത്താൻ ശ്രമിക്കേണ്ടെന്ന് പറഞ്ഞ് സി പി എം കേന്ദ്ര കമ്മിറ്റിയംഗം എ കെ ബാലൻ. അദ്ദേഹം പറഞ്ഞത് സരിൻ തിളങ്ങുന്ന നക്ഷത്രമാകാൻ പോകുന്നുവെന്നാണ്.(AK Balan supports P Sarin )
സരിൻ്റെ കഴിവ് നന്നായി അറിയുന്നവരാണ് സരിൻ ഇഫക്ട് ഉണ്ടായില്ലെന്ന് അധിക്ഷേപിക്കുന്നവരെന്നും, അദ്ദേഹത്തെ സി പി എം പൂർണമായും സംരക്ഷിക്കുമെന്നും പറഞ്ഞ ബാലൻ, പോളിംഗ് കുറഞ്ഞാലും പാർട്ടിയുടെ അടിസ്ഥാന വോട്ട് നഷ്ടമായിരുന്നില്ലെന്നും കൂട്ടിച്ചേർത്തു.
പാലക്കാട് നടന്നത് വടകര ഡീലിൻ്റെ തുടർച്ചയാണെന്ന് ആരോപിച്ച അദ്ദേഹം, ഇക്കാര്യത്തിൽ സരിൻ നൽകിയ മുന്നറിയിപ്പ് പൂർണമായും ശരിയായെന്നും പറഞ്ഞു. ചരിത്രത്തിലാദ്യമായാണ് ആർ എസ് എസ് പ്രവർത്തകൻ യു ഡി എഫിൽ നിന്ന് പ്രവർത്തിച്ചതെന്നും, സന്ദീപ് വാര്യർ യു ഡി എഫ്-ആർ എസ് എസ് പാലം ആയിരുന്നുവെന്നും പറഞ്ഞ എ കെ ബാലൻ, വർഗീയ ശക്തികളുടെ വഴിവിട്ട സഹായം യു ഡി എഫ് നേടിയെന്നും, തെരഞ്ഞെടുപ്പ് ഫലത്തെ എൽ ഡി എഫിൻ്റെ രണ്ടാം സ്‌ഥാനത്തേക്കുള്ള വരവിൻ്റെ നല്ല സൂചനയായി കാണാമെന്നും കൂട്ടിച്ചേർത്തു.
പെട്ടി പരസ്യ വിവാദങ്ങൾ ഇതുവരെയും പരിശോധിച്ചിട്ടില്ലെന്നും, ആവശ്യം വന്നാൽ പരിശോധിക്കുമെന്നും അദ്ദേഹം അറിയിച്ചു.