നാഗർകോവിൽ: തിരുവനന്തപുരം കഴക്കൂട്ടത്ത് നിന്നും കാണാതായ 13കാരിക്ക് വേണ്ടി കന്യാകുമാരി ബീച്ചിലടക്കം പരിശോധന നടത്തി പോലീസ്. കുട്ടിയുടെ ഫോട്ടോ പരിസരത്തെ കടകളിലും, ഫോട്ടോഗ്രാഫര്‍മാരെയും കാണിച്ചു. കുട്ടിയെ കാണാതായിട്ട് 21 മണിക്കൂർ പിന്നിട്ടിരിക്കുകയാണ്. പോലീസ് കന്യാകുമാരിയിൽ പരിശോധന വ്യാപകമാക്കിയിട്ടുണ്ട്. ബസ് സ്റ്റാൻഡിലടക്കം പരിശോധന തുടരുകയാണ്.
കഴക്കൂട്ടം എസ് പി നിയാസ് അറിയിച്ചത് കുട്ടി കന്യാകുമാരിയിൽ എത്തിയതായി സ്ഥിരീകരിച്ചുവെന്നാണ്. കേരള പോലീസ് തിരച്ചിൽ തുടരുന്നതോടൊപ്പം, തമിഴ്നാട് പോലീസിൻ്റെ സഹായവും തേടിയിട്ടുണ്ട്. ഡി സി പി ഭരത് റെഡ്ഡി പറഞ്ഞത് അന്വേഷണത്തിൽ ശുഭപ്രതീക്ഷയുണ്ടെന്നാണ്. കുട്ടിയെ കന്യാകുമാരിയിൽ കണ്ടതായി മൊഴി ലഭിച്ചെന്ന് പറഞ്ഞ അദ്ദേഹം, സി സി ടി വി ദൃശ്യങ്ങൾ പരിശോധിക്കുന്നുവെന്നും അറിയിച്ചു.
പുലർച്ചെ 5.30ന് കുട്ടി നടന്നുപോകുന്നതായി കണ്ടെന്ന് ഓട്ടോ ഡ്രൈവർമാർ പറഞ്ഞതായി പോലീസ് വ്യക്തമാക്കി. കുട്ടിയെ കണ്ടത് കന്യാകുമാരി ബീച്ചിന് സമീപത്തെ ഓട്ടോ ഡ്രൈവർമാരാണ്.
പോലീസിൻ്റെ ആദ്യ സംഘമാണ് കന്യാകുമാരിയിലെത്തിയത്. കുട്ടി ഇന്നലെ കന്യാകുമാരിയിലേക്ക് പോയത് ഉച്ചയ്ക്കുള്ള ബെംഗളൂരു-കന്യാകുമാരി ട്രെയിനിലാണ്. കുട്ടിയെ കണ്ടതായി യാത്രക്കാരി ബബിത അറിയിച്ചിരുന്നു. ട്രെയിനിൽ കയറിയത് തമ്പാനൂരിൽ നിന്നാണ്. ട്രെയിനിൽ ഇരുന്ന് കരയുന്നത് കണ്ടാണ് യാത്രക്കാരി ഫോട്ടോ പകർത്തിയത്.