ഹിമാചൽ പ്രദേശിൽ 200 കിലോഗ്രാം ഭാരമുള്ള പശുവിനെ ചുമന്ന് കാൽനടയായി ആശുപത്രിയിൽ എത്തിച്ച സഹോദരന്മാരുടെ ദൃശ്യങ്ങൾ നെറ്റിസൺസിന്റെ ഹൃദയം കീഴടക്കുന്നു(Brothers carry sick cow). സോഷ്യൽ മീഡിയ പ്ലാറ്റ് ഫോമായ ഇൻസ്റ്റഗ്രാമിൽ @streetdogsofbombay എന്ന ഹാൻഡിലാണ് ദൃശ്യങ്ങൾ പങ്കുവച്ചത്.
ഹിമാചൽ പ്രദേശിലെ സിർമൗർ ജില്ലയിലെ ക്യാരി എന്ന വിദൂര ഗ്രാമത്തിലാണ് ദൃശ്യങ്ങൾക്കാസ്പദമായ സംഭവം നടന്നത്. ദൃശ്യങ്ങളിൽ, രണ്ട് സഹോദരന്മാർ തങ്ങളുടെ 200 കിലോഗ്രാം ഭാരമുള്ള പശുവിനെ കാൽനടയായി ചുമന്ന് ഒരു മലമ്പ്രദേശത്തിലൂടെ നടക്കുന്നത് കാണാം.
രോഗിയായ പശുവിന് വഴുക്കലുള്ളതും കുത്തനെയുള്ളതുമായ മലനിരകളിലൂടെ കാൽനടയായി നടക്കാൻ പ്രയാസമാണെന്ന് മനസിലാക്കിയാണ് രക്ഷാപ്രവർത്തനത്തിന് അവർ തയ്യാറായത്. സഹോദരന്മാരുടെ ദൃഢനിശ്ചയം നിമിത്തം പശുവിനെ ചികിത്സയ്ക്കായി കൃത്യസമയത്ത് ആശുപത്രിയിൽ എത്തിക്കാൻ കഴിഞ്ഞതായാണ് വിവരം.