ആകാശത്തിന് താഴെ കൂടി കടന്നു പോകുന്ന വൈദ്യുത കമ്പികൾക്ക് മുകളിലൂടെ തന്റെ ഭക്ഷണം അന്വേഷിച്ച് നടന്നു പോകുന്ന ഒരു ആടിന്റെ വീഡിയോ സോഷ്യൽ മീഡിയയിൽ പങ്കുവയ്ക്കപ്പെട്ടു. ദൃശ്യങ്ങളിൽ ഒരു വെളുത്ത ആട് ശാന്തമായി വൈദ്യുത വയറിന് മുകളിലൂടെ ബാലൻസ് ചെയ്ത് നടന്നു പോകുന്നത് കാണാം. വൈദ്യുത വയറിന്റെ ഒരറ്റത്ത് തൂങ്ങി കിടക്കുന്ന ഇലകൾ ലക്ഷ്യമാക്കിയാണ് ആട് നടന്നു പോകുന്നത്. ഭയത്തിന്റെ യാതൊരു ലക്ഷണങ്ങളും ആ മൃഗത്തിൽ കാണാനില്ല. മറിച്ച്; അനായാസമായി അത് നടന്ന് മുന്നേറുകയാണ്.
നിരവധി കേബിൾ ലൈനുകളും വൈദ്യുത തൂണുകളും കടന്നുപോകുന്നതിന് താഴെ ഒരു റോഡാണുള്ളത്. ആറ് മീറ്ററിലധികം ഉയരത്തിൽ ഒരു നേർത്ത കമ്പിയിൽ നിൽക്കുന്ന ആടിനെ റോഡിലൂടെ പോകുന്ന ആരും ശ്രദ്ധിക്കുന്നില്ല എന്നതിലുപരി ആരും കാണുന്നില്ല.
ആടുകൾക്ക് മരവും കുന്നും, മലയുമൊക്കെ കയറാൻ വലിയ കഴിവാണുള്ളത്. എന്നാൽ വൈദ്യുത കമ്പിയിലൂടെ അനായാസം ആട് നടന്ന് പോകുന്ന കാഴ്ച കൗതുകം ജനിപ്പിക്കുന്നതാണ്. വീഡിയോ സോഷ്യൽ മീഡിയയിൽ വൈറലായതോടെ, ദൃശ്യങ്ങൾ എഡിറ്റ് ചെയ്തതാണോ എന്ന് പല നെറ്റിസൺമാരും സംശയിച്ചു.
അതേസമയം, സമാനമായ ഒരു സംഭവത്തിൽ, കാലിഫോർണിയയിൽ ഒരു ആട് ഒരു വീടിന് മുകളിൽ കയറുന്നതും മേൽക്കൂരയിൽ നിന്ന് ഇലക്കറികൾ കഴിക്കുന്നതിന്റെയും ദൃശ്യങ്ങൾ കഴിഞ്ഞ വർഷം ഒക്ടോബറിൽ സമൂഹ മാധ്യമത്തിൽ വൈറലായിരുന്നു.