മലപ്പുറം: കുട്ടിയുടെ മാല പൊട്ടിച്ചു വിഴുങ്ങിയ കേസിൽ പ്രതിയായ യുവതി പോലീസിനെ കബളിപ്പിച്ച് തൊണ്ടിമുതൽ നശിപ്പിച്ചു. മാല വീണ്ടെടുക്കാനായി കോഴിക്കോട് മെഡിക്കൽ കോളേജിൽ പ്രവേശിപ്പിച്ച സമീനയാണ്, വിസർജ്യത്തിലൂടെ പുറത്തുവന്ന സ്വർണ്ണമാല ക്ലോസറ്റിലിട്ട് ഫ്ലഷ് ചെയ്തത്.(Woman who swallowed child’s gold chain remanded)
നിലമ്പൂർ ജില്ലാ ആശുപത്രിക്ക് സമീപത്തെ ക്ലിനിക്കിൽ വെച്ചാണ് കുഞ്ഞിന്റെ 3.5 ഗ്രാം സ്വർണ്ണമാല സമീന കവർന്നത്. പിടിക്കപ്പെടുമെന്നായപ്പോൾ മാല വിഴുങ്ങുകയായിരുന്നു. എക്സ്-റേ പരിശോധനയിൽ മാല വയറ്റിലുണ്ടെന്ന് സ്ഥിരീകരിച്ചു.
എനിമ നൽകിയിട്ടും ഫലിക്കാത്തതിനെ തുടർന്ന് വിദഗ്ദ്ധ ചികിത്സയ്ക്കായി കോഴിക്കോട് മെഡിക്കൽ കോളേജിലേക്ക് മാറ്റി. മാല പുറത്തുവരുന്നത് കാത്ത് കാവൽ നിന്നു. ശനിയാഴ്ച അർദ്ധരാത്രിയോടെ വിസർജ്യത്തിലൂടെ മാല പുറത്തുവന്നു. ഇത് തിരിച്ചറിഞ്ഞ സമീന, കാവൽ നിന്ന വനിതാ പോലീസുകാർക്ക് നേരെ വിസർജ്യം എറിയുമെന്ന് ഭീഷണിപ്പെടുത്തി അവരെ മാറ്റിയ ശേഷം മാലയും ഡയപ്പറും ക്ലോസറ്റിലിട്ട് ഒഴുക്കിക്കളയുകയായിരുന്നു.
തുടർന്ന് നടത്തിയ എക്സ്-റേ പരിശോധനയിൽ വയറ്റിൽ ലോഹവസ്തുക്കളില്ലെന്ന് വ്യക്തമായി. ഇതോടെ തൊണ്ടിമുതൽ വീണ്ടെടുക്കാനുള്ള എല്ലാ സാധ്യതകളും അവസാനിച്ചു. മാല നശിപ്പിച്ചതോടെ തെളിവ് നശിപ്പിച്ചതിനും ഔദ്യോഗിക കൃത്യനിർവഹണം തടസ്സപ്പെടുത്തിയതിനുമുള്ള വകുപ്പുകൾ കൂടി പ്രതിക്കെതിരെ ചുമത്തി. നിലമ്പൂർ കോടതിയിൽ ഹാജരാക്കിയ സമീനയെ മഞ്ചേരി സബ് ജയിലിലേക്ക് മാറ്റി.
