ന്യൂഡൽഹി: മെഹ്റൗളിയിൽ പത്തുവയസ്സുകാരിയെ തട്ടിക്കൊണ്ടുപോയി പീഡിപ്പിച്ച് കൊലപ്പെടുത്തിയ സംഭവത്തിൽ 25-കാരനായ ടാക്സി ഡ്രൈവർ അറസ്റ്റിൽ. ബബ്ലു എന്ന ആപ്പ് അധിഷ്ഠിത ടാക്സി ഡ്രൈവറാണ് പോലീസ് പിടിയിലായത്. മെഹ്റൗളിയിലെ വനമേഖലയിൽ നിന്നാണ് പെൺകുട്ടിയുടെ മൃതദേഹം കണ്ടെത്തിയത്.(Taxi Driver Arrested For Kidnapping And Murder Of 10 Year Old Girl In Delhi)
തിങ്കളാഴ്ച പുലർച്ചെ അഞ്ചുമണിയോടെയാണ് പെൺകുട്ടിയെ കാണാനില്ലെന്ന് കുടുംബം പോലീസിനെ അറിയിച്ചത്. ഉടൻ തന്നെ മെഹ്റൗളി പോലീസ് അന്വേഷണം ആരംഭിച്ചു. പ്രദേശത്തെ നൂറുകണക്കിന് സിസിടിവി ദൃശ്യങ്ങൾ പോലീസ് പരിശോധിച്ചു. ഇതിനിടയിൽ സംശയാസ്പദമായ രീതിയിൽ കണ്ട ടാക്സി ഡ്രൈവറെ കേന്ദ്രീകരിച്ച് നടത്തിയ അന്വേഷണമാണ് പ്രതിയിലേക്ക് എത്തിയത്. നാല് മണിക്കൂറിനുള്ളിൽ തന്നെ പോലീസ് പ്രതിയെ പിടികൂടി.
ചോദ്യം ചെയ്യലിൽ പ്രതി കുറ്റം സമ്മതിച്ചു. മെഹ്റൗളിയിലെ സിഡിആർ ചൗക്കിന് സമീപമുള്ള ഫുട്പാത്തിൽ നിന്ന് പെൺകുട്ടിയെ തട്ടിക്കൊണ്ടുപോകുകയും, ഗുരുഗ്രാമിന് അടുത്തുള്ള വനമേഖലയിൽ വെച്ച് പീഡിപ്പിച്ച് കൊലപ്പെടുത്തുകയുമായിരുന്നെന്ന് ഇയാൾ വെളിപ്പെടുത്തി. പ്രതി നൽകിയ വിവരത്തിന്റെ അടിസ്ഥാനത്തിലാണ് പോലീസ് മൃതദേഹം കണ്ടെത്തിയത്.
ബിഹാറിൽ നിന്ന് ഡൽഹിയിലേക്ക് കുടിയേറിയവരാണ് പെൺകുട്ടിയുടെ കുടുംബം. വാടകവീട് നഷ്ടപ്പെട്ടതിനെത്തുടർന്ന് ഫുട്പാത്തിലായിരുന്നു ഇവരുടെ താമസം. ദിവസവേതനക്കാരായ മാതാപിതാക്കൾക്കൊപ്പം ബലൂൺ വിറ്റായിരുന്നു പത്തുവയസ്സുകാരി കുടുംബത്തിന് തുണയായിരുന്നത്. നാല് മക്കളിൽ ഒരാളായിരുന്നു കൊല്ലപ്പെട്ട പെൺകുട്ടി. പ്രതിക്കെതിരെ ശക്തമായ നിയമനടപടികൾ സ്വീകരിക്കുമെന്ന് പോലീസ് അറിയിച്ചു. രാജ്യത്തെ നടുക്കിയ ഈ ക്രൂരകൃത്യത്തിൽ ശക്തമായ പ്രതിഷേധമാണ് ഉയരുന്നത്.
Story Summary
A 25-year-old app-based taxi driver, Bablu, has been arrested for the kidnapping, rape, and murder of a 10-year-old girl in Delhi. The young victim, who sold balloons to support her family living on the pavement, was abducted from Mehrauli and killed in a forested area, with police launching an immediate investigation and apprehending the accused within four hours of the crime being reported.
