ശിവമോഗ: കർണാടകയിലെ ശിവമോഗ ജില്ലയിൽ ഗർഭിണിയായ യുവതി മരിച്ച സംഭവത്തിൽ ഭർത്താവിന്റെ വീട്ടുകാരായ നാലുപേരെ പോലീസ് അറസ്റ്റ് ചെയ്തു. മുപ്പതുകാരിയായ ശ്വേതയാണ് മരിച്ചത്. സ്ത്രീധനത്തെയും സ്വത്തതിർത്തിയെയും ചൊല്ലിയുള്ള തർക്കത്തെത്തുടർന്ന് ശ്വേത തീകൊളുത്തുകയായിരുന്നുവെന്ന് പോലീസ് പറഞ്ഞു.(Pregnant woman dies after immolation bid in Karnataka, 4 in-laws held)
ആറ് വർഷം മുൻപായിരുന്നു ശ്വേതയുടെയും നവീന്റെയും വിവാഹം. കഴിഞ്ഞ കുറച്ചു നാളുകളായി നവീന്റെ കുടുംബവീടിന് സമീപം മറ്റൊരു വീട്ടിലായിരുന്നു ഇവർ താമസിച്ചിരുന്നത്. എന്നാൽ താമസം മാറി രണ്ട് മാസത്തിനുള്ളിൽത്തന്നെ നവീന്റെ സഹോദരനും ഭാര്യയും ശ്വേതയോട് വീട് ഒഴിയാൻ ആവശ്യപ്പെടുകയും ഇതുമായി ബന്ധപ്പെട്ട് തർക്കങ്ങൾ നിലനിൽക്കുകയും ചെയ്തിരുന്നു.
മാർച്ച് 29 ഞായറാഴ്ച പ്രശ്നപരിഹാരത്തിനായി ഗ്രാമപഞ്ചായത്ത് യോഗം ചേരുന്നതിനിടെ വീട്ടിൽ വെച്ച് വീണ്ടും വഴക്കുണ്ടായി. ഇതിനിടെ ശ്വേത ശരീരത്തിൽ പെട്രോൾ ഒഴിച്ച് തീകൊളുത്തുകയായിരുന്നു. ഗുരുതരമായി പൊള്ളലേറ്റ ശ്വേതയെ ഉടൻ തന്നെ ആശുപത്രിയിൽ എത്തിച്ചെങ്കിലും ഏപ്രിൽ 1 ബുധനാഴ്ച മണിപ്പാലിലെ കസ്തൂർബ ആശുപത്രിയിൽ വെച്ച് മരണം സംഭവിക്കുകയായിരുന്നു.
ശ്വേത നിരന്തരമായ ശാരീരിക-മാനസിക പീഡനങ്ങൾക്ക് ഇരയായിരുന്നുവെന്ന് ബന്ധുക്കൾ ആരോപിച്ചു. മരിക്കുന്നതിന് മുൻപ് പ്രതികൾ ശ്വേതയുടെ വീട്ടിലെത്തി അസഭ്യം പറയുകയും മർദ്ദിക്കുകയും ശ്വാസം മുട്ടിക്കാൻ ശ്രമിക്കുകയും ചെയ്തതായി എഫ്ഐആറിൽ പറയുന്നു. ഈ അപമാനവും പീഡനവും സഹിക്കവയ്യാതെയാണ് ശ്വേത ആത്മഹത്യ ചെയ്തതെന്നാണ് കുടുംബത്തിന്റെ പരാതി. ശ്വേതയുടെ മരണത്തിന് പിന്നാലെ ഭർത്താവിന്റെ കുടുംബത്തിലെ നാല് പേരെ പോലീസ് അറസ്റ്റ് ചെയ്ത് കോടതിയിൽ ഹാജരാക്കി. ഇവരെ നിലവിൽ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്.
