കോഴിക്കോട്: കാര് യാത്രക്കാരായ ദമ്പതികളെ ആക്രമിച്ച് പണം കവര്ന്ന കേസില് ആറ് പേരെ അറസ്റ്റ് ചെയ്തു. മാളിക്കടവ് ബൈപ്പാസ് റോഡില് കാര് നിര്ത്തി സംസാരിക്കുകയായിരുന്ന ദമ്പതികളെ ബൈക്കില് വന്ന പ്രതികള് ആക്രമിക്കുകയായിരുന്നു. (extorting money)
കോഴിക്കോട് വെസ്റ്റ്ഹില് സ്വദേശി റാഫി മന്സിലില് ഐന് മുഹമ്മദ് ഷാഹിന്(19), നടക്കാവ് സ്വദേശി ചെറുവോട്ട് ഉദിത്ത്(18), കക്കോടി സ്വദേശി റദിന്(19), കക്കോടി കൂടത്തുംപൊയില് സ്വദേശി നിഹാല്(20), കക്കോടി സ്വദേശി പൊയില്ത്താഴത്ത് അഭിനവ്(23), ചേളന്നൂര് ചെറുവോട്ട് വയല് വൈഷ്ണവ്(23) എന്നിവരെയാണ് അറസ്റ്റ് ചെയ്തത്. ചേവായൂര് ഇന്സ്പെക്ടര് സജീവന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. വ്യാഴാഴ്ച വൈകീട്ടാണ് സംഭവം നടന്നത്. കല്ലുപയോഗിച്ച് കാറിന്റെ ചില്ല് തകര്ക്കാന് ശ്രമിക്കുന്നതിനിടെ വണ്ടി മുന്നോട്ടെടുക്കാന് ശ്രമിച്ച പരാതിക്കാരനെ ചാവി കൊണ്ട് കഴുത്തിന് കുത്തിയ സംഘം ഇയാളുടെ ഭാര്യ ധരിച്ചിരുന്ന വസ്ത്രത്തിന്റെ കോളറില് കയറിപ്പിടിക്കുകയും ചെയ്തു. എതിര്ക്കാന് ശ്രമിച്ചപ്പോള് ഭീഷണിപ്പെടുത്തി 2000 രൂപ ഓണ്ലൈനായി അയപ്പിക്കുകയും ഫോണ് പിടിച്ചുവാങ്ങി എറിഞ്ഞ് തകര്ക്കുകയും ചെയ്തു. പിന്നീട് ഇവര് കടന്നുകളയുകയായിരുന്നു.