റോം: യൂറോപ്പിലെ ഈസ്റ്റർ ആഘോഷങ്ങൾക്ക് മധുരം പകരാൻ എത്തിച്ച 12 ടൺ കിറ്റ്കാറ്റ് ചോക്ലേറ്റുകൾ തട്ടിയെടുത്തു. മാർച്ച് 26-ന് മധ്യ ഇറ്റലിയിലെ ഫാക്ടറിയിൽ നിന്ന് പോളണ്ടിലെ വിതരണക്കാർക്ക് കൊണ്ടുപോകുന്ന വഴിയാണ് ലോറി സഹിതം ചോക്ലേറ്റുകൾ കാണാതായത്. 4,13,793 യൂണിറ്റ് ചോക്ലേറ്റുകളാണ് മോഷ്ടിക്കപ്പെട്ടതെന്ന് കിറ്റ്കാറ്റിന്റെ മാതൃകമ്പനിയായ നെസ്ലെ അറിയിച്ചു.(12 tons of KitKat ‘stolen’, Massive chocolate theft in Europe ahead of Easter)
മോഷ്ടിക്കപ്പെട്ടവയിൽ കിറ്റ്കാറ്റിന്റെ ഏറ്റവും പുതിയ ‘ഫോർമുല വൺ’ തീം ചോക്ലേറ്റുകളും ഉൾപ്പെടുന്നു. കഴിഞ്ഞ വർഷം എഫ് വണ്ണിന്റെ ഔദ്യോഗിക ചോക്ലേറ്റ് പങ്കാളിയായതിന് ശേഷം പുറത്തിറക്കിയ, റേസിംഗ് കാറുകളുടെ ആകൃതിയിലുള്ള പ്രത്യേക ചോക്ലേറ്റുകളാണിവ.
“ഞങ്ങൾ എപ്പോഴും ആളുകളോട് കിറ്റ്കാറ്റിനൊപ്പം ഒരു ‘ബ്രേക്ക്’ എടുക്കാൻ പറയാറുണ്ട്. എന്നാൽ മോഷ്ടാക്കൾ ആ സന്ദേശം അക്ഷരാർത്ഥത്തിൽ എടുത്ത് 12 ടൺ ചോക്ലേറ്റുമായി മുങ്ങിയിരിക്കുകയാണ്,” നെസ്ലെ തമാശരൂപേണ പ്രതികരിച്ചു. മോഷ്ടിക്കപ്പെട്ട ചോക്ലേറ്റുകൾ അനധികൃത വിപണികളിൽ എത്താൻ സാധ്യതയുണ്ടെന്ന് കമ്പനി മുന്നറിയിപ്പ് നൽകി. എന്നാൽ, പാക്കറ്റുകളിൽ അച്ചടിച്ചിട്ടുള്ള ബാച്ച് കോഡുകൾ സ്കാൻ ചെയ്യുന്നതിലൂടെ ഉപഭോക്താക്കൾക്കും വ്യാപാരികൾക്കും ഇവ മോഷ്ടിക്കപ്പെട്ടവയാണോ എന്ന് തിരിച്ചറിയാൻ സാധിക്കും. സംശയാസ്പദമായ ഉൽപ്പന്നങ്ങൾ കണ്ടാൽ കമ്പനിയെ അറിയിക്കാനുള്ള സംവിധാനവും ഒരുക്കിയിട്ടുണ്ട്.
ചരക്ക് മോഷണം ആഗോളതലത്തിൽ ബിസിനസുകൾ നേരിടുന്ന വലിയ വെല്ലുവിളിയാണെന്ന് നെസ്ലെ ചൂണ്ടിക്കാട്ടി. സംഭവത്തിൽ പ്രാദേശിക അധികൃതരുമായി ചേർന്ന് അന്വേഷണം നടത്തിവരികയാണ്. അതേസമയം, ഈ മോഷണം വിപണിയിലെ ചോക്ലേറ്റ് വിതരണത്തെ ബാധിക്കില്ലെന്നും ഉപഭോക്താക്കളുടെ സുരക്ഷയിൽ ആശങ്ക വേണ്ടെന്നും കമ്പനി വ്യക്തമാക്കി.
