മാന്നാർ: അച്ചൻകോവിലാറ്റിൽ കുളിക്കാൻ ഇറങ്ങിയ യുവാവ് കാൽ വഴുതി വീണു മരിച്ചു (Mannar drowning incident). എണ്ണയ്ക്കാട് പെരിങ്ങിലിപ്പുറം പൂവൻതറയിൽ വീട്ടിൽ എ.എസ്. മിഥുൻകുമാർ (38) ആണ് മരിച്ചത്. ഞായറാഴ്ച പകൽ 3.30-ഓടെ വീടിന് സമീപമുള്ള മഞ്ഞപ്പള്ളിക്കടവിൽ വസ്ത്രം അലക്കുവാനും കുളിക്കുവാനുമായി എത്തിയ മിഥുൻ അബദ്ധത്തിൽ കാൽ വഴുതി ശക്തമായ ഒഴുക്കുള്ള ആറ്റിലേക്ക് വീഴുകയായിരുന്നു.
മിഥുൻ ആറ്റിൽ വീണതറിഞ്ഞ് നാട്ടുകാർ വിവരമറിയിച്ചതിനെ തുടർന്ന് ചെങ്ങന്നൂർ, മാവേലിക്കര എന്നിവിടങ്ങളിൽ നിന്നെത്തിയ അഗ്നിരക്ഷാ യൂണിറ്റും സ്കൂബാ ടീമും സംയുക്തമായി പുഴയിൽ വിപുലമായ തെരച്ചിൽ നടത്തി. തുടർന്ന് വൈകിട്ട് 4.50-ഓടെയാണ് മിഥുന്റെ മൃതദേഹം കണ്ടെത്താനായത്. കോട്ടയം പുതുപ്പള്ളി കേന്ദ്രീകരിച്ച് ഫാബ്രിക്കേഷൻ തൊഴിൽ നടത്തിവരികയായിരുന്നു മിഥുൻകുമാർ.
നിലവിൽ മൃതദേഹം ഇൻക്വസ്റ്റ് നടപടികൾക്ക് ശേഷം മാവേലിക്കര ജില്ലാ ആശുപത്രി മോർച്ചറിയിലേക്ക് മാറ്റിയിരിക്കുകയാണ്. സംസ്കാരം പിന്നീട് നടക്കും. കോട്ടയം പുതുപ്പള്ളി അയ്യങ്കുളം വീട്ടിൽ പരേതരായ സുകുമാരന്റെയും രാധുവിന്റെയും മകനാണ് മിഥുൻ. ഭാര്യ: സൗമ്യ മിഥുൻ, മകൾ : മൃദുല മിഥുൻ. സംഭവത്തിൽ മാന്നാർ പോലീസ് നിയമപരമായ തുടർനടപടികൾ സ്വീകരിച്ചുവരുന്നു.
Story Summary: A 38-year-old man, A.S. Mithunkumar, drowned after accidentally slipping into the Achenkovil River at Manjappallikadavu near Mannar. Fireforce and Scuba teams from Chengannur and Mavelikara recovered the body after a search operation, and the deceased is survived by his wife and daughter.
