ലഖ്നൗ: ഉത്തർപ്രദേശിൽ കുടിവെള്ളമാണെന്ന് കരുതി ആസിഡ് കുടിച്ച യുവതി അതീവ ഗുരുതരാവസ്ഥയിൽ (Uttar pradesh acid incident). ലഖ്നൗവിലെ ഹാപൂർ ജില്ലയിലെ അർജുൻ നഗർ പ്രദേശത്ത് കഴിഞ്ഞ വെള്ളിയാഴ്ചയാണ് നാടിനെ നടുക്കിയ സംഭവം നടന്നത്. ഗുരുതരമായി പൊള്ളലേറ്റ യുവതി നിലവിൽ മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്.
അർജുൻ നഗറിലെ ഒരു പ്രമുഖ ജ്വല്ലറിയിൽ സ്വർണം വാങ്ങാനെത്തിയതായിരുന്നു യുവതി. കടയിൽ വെച്ച് കടുത്ത ദാഹം അനുഭവപ്പെട്ടതിനെ തുടർന്ന് ഇവർ ജ്വല്ലറി ജീവനക്കാരനോട് കുടിക്കാൻ വെള്ളം ആവശ്യപ്പെടുകയായിരുന്നു. ജ്വല്ലറിയിൽ വെള്ളം തീർന്നിരുന്നതിനാൽ ജീവനക്കാരൻ തൊട്ടടുത്തുള്ള പലചരക്ക് കടയിൽ ചെന്ന് സീൽ ചെയ്ത ഒരു വാട്ടർ ബോട്ടിൽ വാങ്ങി നൽകി. പലചരക്ക് കടയിലെ ഫ്രിഡ്ജിൽ സൂക്ഷിച്ചിരുന്ന കുപ്പി യാതൊരു പരിശോധനയും കൂടാതെ കടക്കാരൻ ജീവനക്കാരന് എടുത്തു നൽകുകയായിരുന്നുവെന്നാണ് വിവരം.
ബോട്ടിൽ തുറന്ന് യുവതി ഒരു സിപ്പ് വെള്ളം കുടിച്ചയുടൻ തന്നെ കടുത്ത വേദനകൊണ്ട് പുളയുകയും വായിൽ നിന്നും പുക ഉയരുകയും ചെയ്തു. കുടിച്ച ദ്രാവകം തുപ്പിക്കളയാനായി ഇവർ ഓടി പുറത്തേക്ക് പോകുന്നതിന്റെ ഞെട്ടിക്കുന്ന സിസിടിവി (CCTV) ദൃശ്യങ്ങൾ പുറത്തുവന്നിട്ടുണ്ട്. കുടിവെള്ള കുപ്പിയുടെ അതേ രൂപത്തിലുള്ള ബോട്ടിലിൽ സൂക്ഷിച്ചിരുന്ന ആസിഡാണ് യുവതി കുടിച്ചതെന്ന് പിന്നീട് വ്യക്തമായി.
യുവതിയുടെ ആന്തരിക അവയവങ്ങൾക്കും തൊണ്ടയ്ക്കും മാരകമായി പൊള്ളലേറ്റതിനെ തുടർന്ന് ജ്വല്ലറി ജീവനക്കാരും നാട്ടുകാരും ചേർന്ന് ഉടനടി സമീപത്തെ പ്രാദേശിക ആശുപത്രിയിൽ എത്തിച്ചു. എന്നാൽ ആരോഗ്യനില അതിവേഗം വഷളായതിനെ തുടർന്ന് വിദഗ്ദ്ധ ചികിത്സയ്ക്കായി ഇവരെ മറ്റൊരു മെഡിക്കൽ കോളേജ് ആശുപത്രിയിലേക്ക് മാറ്റി. സംഭവവുമായി ബന്ധപ്പെട്ട് അശ്രദ്ധമായി ആസിഡ് ബോട്ടിൽ നൽകിയ പലചരക്ക് കടയുടമയെ പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്. ഈ കടയിൽ നടത്തിയ പരിശോധനയിൽ കുടിവെള്ള ബോട്ടിലുകൾക്ക് സമാനമായ രൂപത്തിൽ സൂക്ഷിച്ചിരുന്ന കൂടുതൽ ആസിഡ് കുപ്പികൾ പോലീസ് കണ്ടെടുത്തു. സംഭവത്തിൽ കേസെടുത്ത് വിപുലമായ അന്വേഷണം ആരംഭിച്ചതായി ഹാപൂർ പോലീസ് അറിയിച്ചു.
Story Summary: A woman was left in critical condition after mistakenly consuming acid, thinking it was drinking water, at a jewelry shop in Hapur, Uttar Pradesh. The acid bottle was purchased from a neighboring grocery shop where it was kept in a refrigerator, leading the police to detain the shopkeeper and recover more acid bottles.
