ആലപ്പുഴ: ഓടിക്കൊണ്ടിരുന്ന മെമു ട്രെയിനിന്റെ ബ്രേക്ക് തകരാറിലായി ബോഗിയുടെ പിൻഭാഗത്തുനിന്ന് വൻതോതിൽ പുക ഉയർന്ന സംഭവത്തിൽ ദക്ഷിണ റെയിൽവേ വിശദമായ സാങ്കേതിക പരിശോധനയ്ക്ക് ഒരുങ്ങുന്നു (Kerala train accident). പുക ഉയർന്ന ബോഗി ട്രെയിനിൽ നിന്ന് അഴിച്ചുമാറ്റിയാകും സാങ്കേതിക വിഭാഗം പരിശോധന നടത്തുക. ട്രെയിൻ ചക്രങ്ങൾ പാളത്തിലൂടെ ഉരസി നീങ്ങിയതിനാൽ ബോഗിക്ക് പുറമെ റെയിൽവേ പാളത്തിനും കേടുപാടുകൾ സംഭവിച്ചിട്ടുണ്ടോ എന്ന് പരിശോധിക്കും. ബ്രേക്കിങ് സിസ്റ്റത്തിലുണ്ടായ തകരാർ മൂലം ചക്രം ലോക്കാവുകയും ഇത് പാളത്തിൽ ഞെരുങ്ങി ഉരഞ്ഞതുമാണ് തീയും പുകയുമുണ്ടാകാൻ കാരണമെന്നാണ് പ്രാഥമിക നിഗമനം.
വ്യാഴാഴ്ച എറണാകുളം– കോട്ടയം– കായംകുളം മെമു ട്രെയിനിലാണ് അപകടകരമായ രീതിയിൽ പുക ഉയർന്നത്. ട്രെയിൻ ഈരേഴ ഭാഗത്ത് എത്തിയപ്പോൾ ട്രാക്കിൽ ജോലി ചെയ്തിരുന്ന റെയിൽവേ ജീവനക്കാരാണ് (ട്രാക്ക് മെയിന്റനർമാർ) പിൻഭാഗത്തെ ബോഗിയിൽ നിന്ന് പുക ഉയരുന്നത് ആദ്യം ശ്രദ്ധിച്ചത്. ഇവർ ഉടൻ തന്നെ തൊട്ടടുത്ത ലെവൽക്രോസുകളിൽ വിവരമറിയിക്കുകയായിരുന്നു. അവിടെനിന്ന് ഉദ്യോഗസ്ഥർ സ്റ്റേഷൻ മാസ്റ്ററെ ബന്ധപ്പെടുകയും നിർദേശാനുസരണം കൊയ്പ്പള്ളി കാരായ്മ ഭാഗത്ത് ട്രെയിൻ അടിയന്തരമായി നിർത്തുകയുമായിരുന്നു. അപ്പോഴേക്കും പുക ഉയർന്ന നിലയിൽ ട്രെയിൻ ഒന്നര കിലോമീറ്ററോളം മുന്നോട്ട് പോയിരുന്നു.
സംഭവത്തെ തുടർന്ന് മണിക്കൂറുകളോളം ട്രെയിൻ പാളത്തിൽ നിർത്തിയിടേണ്ടി വന്നത് ഈ റൂട്ടിലെ മറ്റ് സർവീസുകളെയും ബാധിച്ചു. വൈകിട്ടോടെയാണ് റെയിൽവേ സാങ്കേതിക വിദഗ്ധരെത്തി തകരാർ പരിഹരിച്ച് ഗതാഗതം പുനഃസ്ഥാപിച്ചത്. ചക്രം പാളത്തിൽ അതിശക്തമായി ഉരസിയതിനെ തുടർന്ന് സുരക്ഷ മുൻനിർത്തി ഈ ഭാഗത്ത് നിലവിൽ ട്രെയിനുകൾക്ക് വേഗനിയന്ത്രണം ഏർപ്പെടുത്തിയിട്ടുണ്ട്.
Story Summary: The Indian Railways will conduct a detailed technical inspection by detaching the coach of the Ernakulam-Kayamkulam MEMU train that emitted heavy smoke due to a brake binding issue. Track maintainers averted a major mishap by alerting officials, after which the train was halted, causing temporary delays on the route.
