കൊച്ചി: പ്രമുഖ നടിമാരായ ശ്വേതാ മേനോൻ, ലക്ഷ്മി പ്രിയ എന്നിവർക്കെതിരെ നടി അൻസിബ ഹസ്സൻ നൽകിയ പരാതിയിൽ നിലവിൽ കേസെടുക്കാൻ സാധിക്കില്ലെന്ന് സിറ്റി പോലീസ് (Ansiba Hassan Complaint Shweta Menon Lakshmi Priya). പരാതിക്കാരിയായ അൻസിബയ്ക്ക് പാലാരിവട്ടം പോലീസ് ഇത് സംബന്ധിച്ച് ഔദ്യോഗികമായി മറുപടി നൽകി. വിവാദമായ ലക്ഷ്മി പ്രിയയുടെ യൂട്യൂബ് അഭിമുഖം ഉൾപ്പെടെയുള്ള ഡിജിറ്റൽ തെളിവുകൾ പോലീസ് സംഘം വിശദമായി പരിശോധിച്ചുവെന്നും, എന്നാൽ പ്രഥമദൃഷ്ട്യാ നിയമപരമായി കേസെടുക്കാവുന്ന തരത്തിലുള്ള കുറ്റങ്ങളൊന്നും അതിൽ കണ്ടെത്താൻ കഴിഞ്ഞിട്ടില്ലെന്നും പോലീസ് അറിയിച്ചു. വിഷയത്തിൽ തുടർനടപടികൾക്കായി അൻസിബയ്ക്ക് നേരിട്ട് കോടതിയെ സമീപിക്കാമെന്നും പൊലീസിന്റെ ഔദ്യോഗിക മറുപടിയിൽ വ്യക്തമാക്കുന്നുണ്ട്.
യൂട്യൂബ് ചാനലുകളിലൂടെയും മറ്റ് സോഷ്യൽ മീഡിയ പ്ലാറ്റ്ഫോമുകളിലൂടെയും തനിക്കെതിരെ കടുത്ത അപകീർത്തികരമായതും അശ്ലീലവും വ്യാജവുമായ പ്രചാരണങ്ങൾ നടത്തിയെന്നാണ് അൻസിബ പോലീസിൽ നൽകിയ പരാതിയിൽ ആരോപിക്കുന്നത്. തന്നെ പരസ്യമായി വ്യക്തിഹത്യ ചെയ്യാൻ ശ്വേതാ മേനോനും ലക്ഷ്മിപ്രിയയും ചേർന്ന് കൃത്യമായ ഗൂഢാലോചന നടത്തിയെന്നും അൻസിബ പരാതിയിൽ പറഞ്ഞിരുന്നു. സമൂഹമാധ്യമങ്ങളിൽ പ്രചരിപ്പിക്കുന്ന ചില വീഡിയോകളിലെ പരാമർശങ്ങൾ തികച്ചും അശ്ലീലവും ഒരു സ്ത്രീ എന്ന നിലയിൽ തന്റെ അന്തസിനെയും മര്യാദയെയും പൂർണ്ണമായി തകർക്കുന്നതുമാണെന്നും, ഇത് പൊതുസമൂഹ മധ്യത്തിൽ തനിക്ക് വലിയ അപകീർത്തിയുണ്ടാക്കിയെന്നും അൻസിബ ചൂണ്ടിക്കാണിച്ചിരുന്നു.
പിആർ ഏജൻസി കരാർ ആരോപണം
ലക്ഷമി പ്രിയയും ശ്വേത മേനോനും തനിക്കെതിരെ നിരന്തരം ഗൂഢാലോചന നടത്തുന്നു, സ്ത്രീത്വത്തെ അപമാനിക്കാൻ വ്യാജ ആരോപണങ്ങൾ ബോധപൂർവ്വം കെട്ടിച്ചമയ്ക്കുന്നു, സമൂഹ മാധ്യമങ്ങളിലൂടെ അശ്ലീലം നിറഞ്ഞ വീഡിയോകൾ നിർമ്മിച്ച് പ്രചരിപ്പിച്ചു എന്നിവയാണ് അൻസിബയുടെ പരാതിയിലെ പ്രധാന ഉള്ളടക്കം. കൂടാതെ ഇത്തരം അപകീർത്തികരമായ കാര്യങ്ങൾ ഡിജിറ്റൽ ഇടങ്ങളിൽ വ്യാപകമായി പ്രചരിപ്പിക്കുന്നതിനായി നടി ശ്വേതാ മേനോൻ തിരുവനന്തപുരത്തെ ഒരു പ്രമുഖ പിആർ (PR) ഏജൻസിയുമായി ലക്ഷങ്ങൾ വിലമതിക്കുന്ന കരാറുണ്ടാക്കി എന്നും അൻസിബ പരാതിയിൽ ഗുരുതരമായി ആരോപിച്ചിരുന്നു. എന്നാൽ സൈബർ പരിശോധനയിലടക്കം ക്രിമിനൽ കുറ്റം ചുമത്താനുള്ള തെളിവുകൾ ലഭിക്കാത്തതിനാലാണ് പാലാരിവട്ടം പോലീസ് ഇപ്പോൾ കേസ് നടപടികളിൽ നിന്നും പിന്മാറിയത്.
Story Summary:
Palarivattom Police has informed actress Ansiba Hassan that no criminal case can be registered against actresses Shweta Menon and Lakshmi Priya based on her complaint. After reviewing the controversial YouTube interviews, the police stated that no cognizable offenses were found and advised Ansiba to approach the court for further legal remedies. Ansiba’s complaint alleged that Shweta and Lakshmi Priya conspired to defame her character, circulated obscene videos, and that Shweta even contracted a Thiruvananthapuram-based PR agency to tarnish her reputation.
