അറ്റ്ലാന്റ: ഫിഫ ലോകകപ്പ് (FIFA World Cup Argentina vs Egypt) പ്രീക്വാർട്ടർ പോരാട്ടത്തിൽ കരുത്തരായ അർജന്റീനയെ ഞെട്ടിച്ച് ഈജിപ്തിന് ആദ്യപകുതിയിൽ അട്ടിമറി ലീഡ്. അറ്റ്ലാന്റ സ്റ്റേഡിയത്തിൽ നടക്കുന്ന ആവേശം നിറഞ്ഞ മത്സരത്തിന്റെ 15-ാം മിനിറ്റിൽ തന്നെ അർജന്റീനയുടെ നെഞ്ച് പിളർത്തിക്കൊണ്ട് ഈജിപ്ത് ആദ്യ ഗോൾ നേടി. പ്രതിരോധ താരം യാസർ ഇബ്രാഹിമാണ് മനോഹരമായ ഒരു ഹെഡറിലൂടെ അർജന്റീനയുടെ വല കുലുക്കിയത്. ബോക്സിന് പുറത്തുനിന്നു മർവാൻ അറ്റിയ കൃത്യതയോടെ നൽകിയ പന്ത് പോസ്റ്റിന് തൊട്ടുമുന്നിൽ വെച്ച് യാസർ ഹെഡ് ചെയ്ത് വലയിലാക്കുകയായിരുന്നു.
അതേസമയം, മത്സരത്തിന്റെ ആദ്യ മിനിറ്റുകളിൽ അർജന്റീനയ്ക്ക് ലഭിച്ച രണ്ട് സുവർണ്ണ അവസരങ്ങളാണ് പാഴായത്. കളിയുടെ ഏഴാം മിനിറ്റിൽ ഈജിപ്ത് പോസ്റ്റ് ലക്ഷ്യമാക്കി എൻസോ ഫെർണാണ്ടസ് തൊടുത്ത തകർപ്പൻ ഷോട്ട് നേരിയ വ്യത്യാസത്തിലാണ് പുറത്തുപോയത്. തുടർന്ന് 21-ാം മിനിറ്റിൽ അർജന്റീനയ്ക്ക് അനുകൂലമായി ലഭിച്ച പെനൽറ്റി കിക്ക് സൂപ്പർ താരം ലയണൽ മെസ്സി പാഴാക്കിയത് ലാറ്റിനമേരിക്കൻ ആരാധകരെ നിരാശരാക്കി. ഈ ലോകകപ്പിൽ മെസ്സി പെനൽറ്റി നഷ്ടപ്പെടുത്തുന്നത് ഇത് രണ്ടാം തവണയാണ്. നേരത്തെ, ഓസ്ട്രിയയ്ക്കെതിരെ നടന്ന ഗ്രൂപ്പ് ഘട്ട മത്സരത്തിലും മെസ്സിക്ക് പെനാൽറ്റി ലക്ഷ്യത്തിലെത്തിക്കാൻ കഴിഞ്ഞിരുന്നില്ല.
ടീമുകളിൽ മാറ്റങ്ങൾ
പ്രധാനപ്പെട്ട ഈ പ്രീക്വാർട്ടർ പോരാട്ടത്തിൽ സ്റ്റാർട്ടിങ് ലൈനപ്പിൽ മൂന്നു നിർണ്ണായക മാറ്റങ്ങളോടെയാണ് അർജന്റീന കോച്ച് ടീമിനെ ഇറക്കിയത്. പ്രതിരോധനിരയിൽ ഫക്കുണ്ടോ മെഡിനിയെ മാറ്റി പരിചയസമ്പന്നനായ നിക്കോളാസ് ടാഗ്ലിയാഫിക്കോ സ്ഥാനം പിടിച്ചു. മധ്യനിരയിൽ തിയാഗോ അൽമാഡയ്ക്ക് പകരം ലിയാൻഡ്രോ പരെഡസും മുന്നേറ്റ നിരയിൽ ലൗട്ടാരോ മാർട്ടിനെസിന് പകരം ജൂലിയൻ ആൽവാരസും ആദ്യ ഇലവനിൽ ഇടം നേടി. മറുവശത്ത് ഈജിപ്ത് രണ്ട് മാറ്റങ്ങളുമായാണ് കളത്തിലിറങ്ങിയത്. മുന്നേറ്റ നിരയിൽ ഒമർ മർമൗഷിന് പകരം ഹൈസം ഹസനും മധ്യ നിരയിൽ ഹംദി ഫാത്തിക്ക് പകരം മൊഹനദ് ലഷീനും അണിനിരന്നു.
Story Summary:
Egypt took a stunning 1-0 lead against Argentina in the 15th minute of the FIFA World Cup pre-quarterfinal match in Atlanta, thanks to a header by Yasser Ibrahim from a Marwan Attia pass. Argentina missed key chances, including a close shot by Enzo Fernandez in the 7th minute and a penalty missed by Lionel Messi in the 21st minute, marking his second penalty failure in this World Cup. Both teams introduced crucial tactical changes to their starting lineups for this knockout game.
