ടെഹ്റാൻ: അമേരിക്ക-ഇസ്രായേൽ വ്യോമാക്രമണത്തിൽ കൊല്ലപ്പെട്ട ഇറാന്റെ പരമോന്നത നേതാവ് അയത്തൊള്ള അലി ഖമനേയിയുടെ ഔദ്യോഗിക സംസ്കാര ചടങ്ങുകൾക്ക് ശനിയാഴ്ച ടെഹ്റാനിൽ തുടക്കമായി (Ayatollah Ali Khamenei Funeral Ceremony Tehran). ഫെബ്രുവരി 28-നുണ്ടായ യുദ്ധക്കെടുതിയിൽ ജീവൻ നഷ്ടപ്പെട്ട തങ്ങളുടെ പ്രിയ നേതാവിന് അവസാനമായി ആദരാഞ്ജലിയർപ്പിക്കാൻ ലക്ഷക്കണക്കിന് ഇറാനിയൻ ജനതയാണ് ഒഴുക്കായി എത്തിയത്. യുദ്ധത്തിന് താല്ക്കാലികമായെങ്കിലും അറുതി വന്നതിന് ശേഷമാണ് പരമോന്നത നേതാവിന് രാജ്യം വിട നൽകാനൊരുങ്ങുന്നത്.
ഇറാന്റെ ദേശീയപതാകയിൽ പൂർണ്ണമായും പൊതിഞ്ഞാണ് ഖമനേയിയുടെ മൃതദേഹം ടെഹ്റാനിലെ ഗ്രാൻഡ് മൊസല്ലയിൽ പൊതുദർശനത്തിനായി വെച്ചിരിക്കുന്നത്. ഇതേ ആക്രമണത്തിൽ അദ്ദേഹത്തോടൊപ്പം കൊല്ലപ്പെട്ട മറ്റ് കുടുംബാംഗങ്ങളുടെ മൃതദേഹങ്ങളും പൊതുദർശനത്തിന് വെച്ചിട്ടുണ്ട്. ഇതിൽ അന്തിമോപചാരം അർപ്പിക്കാനെത്തിയവരെയാകെ കണ്ണീരിലാഴ്ത്തിയത് ഖമനേയിയുടെ കൊച്ചുമകൾ സഹ്റ മുഹമ്മദി ഗൊൽപായെഗനിയുടെ കുഞ്ഞു ശവപേടകമായിരുന്നു. അമേരിക്ക-ഇസ്രായേൽ വ്യോമാക്രമണത്തിൽ കൊല്ലപ്പെടുമ്പോൾ വെറും 14 മാസം മാത്രമായിരുന്നു ഈ പിഞ്ചുകുഞ്ഞിന്റെ പ്രായം. കുഞ്ഞു പേടകത്തിനരികിൽ സഹ്റയുടെ മനോഹരമായ ഒരു ചിത്രവും രാജ്യം വച്ചിട്ടുണ്ട്. ചടങ്ങിൽ പങ്കെടുക്കുന്ന ആയിരക്കണക്കിന് ആളുകൾ കറുത്ത വസ്ത്രമണിഞ്ഞാണ് ദുഃഖാചരണത്തിൽ പങ്കുചേരുന്നത്.
ഖമനേയിക്ക് ആദരാഞ്ജലികൾ അർപ്പിക്കാനായി വിവിധ വിദേശ രാജ്യങ്ങളിൽ നിന്നുള്ള പ്രതിനിധികളുടെ പ്രവാഹമാണ് ടെഹ്റാനിലേക്ക് ഉണ്ടാകുന്നത്. ഭാരത സർക്കാരിനെ പ്രതിനിധീകരിച്ച് ബിഹാർ ഗവർണർ സയ്യിദ് അതാ ഹസ്നൈൻ, കേന്ദ്ര വിദേശകാര്യ സഹമന്ത്രി പബിത്ര മാർഗരിത എന്നിവർ ചടങ്ങുകളിൽ പങ്കെടുത്ത് ഇന്ത്യയുടെ അനുശോചനം അറിയിച്ചു.
രാജ്യത്തെ ഏറ്റവും വലിയ സംസ്കാര ചടങ്ങാക്കി മാറ്റാനാണ് ഇറാൻ ഭരണകൂടത്തിന്റെ നീക്കം. മൂന്ന് ദിവസത്തേക്ക് മൃതദേഹങ്ങൾ ഗ്രാൻഡ് മൊസല്ലയിൽ പൊതുദർശനത്തിന് വെക്കും. ഇറാന്റെയും ഇറാഖിന്റെയും ചരിത്രപ്രാധാന്യമുള്ള അഞ്ച് നഗരങ്ങളിലായാണ് ചടങ്ങുകൾ ക്രമീകരിച്ചിരിക്കുന്നത്. ടെഹ്റാനിലെ ചടങ്ങുകൾക്ക് ശേഷം, ഖമനയിയുടെ ഭൗതികശരീരം ഇറാഖിലെ പുണ്യനഗരങ്ങളായ നജഫ്, കർബല എന്നിവിടങ്ങളിലേക്ക് കൊണ്ടുപോകും. തുടർന്ന് ജൂലൈ 9 വ്യാഴാഴ്ച ഖമനയിയുടെ ജന്മനാടായ മഷ്ഹദിലെ പ്രശസ്തമായ ഇമാം റെസയുടെ ആരാധനാലയത്തിൽ വെച്ചായിരിക്കും ഔദ്യോഗിക ഖബറടക്കം നടക്കുക. ലക്ഷക്കണക്കിന് ആളുകൾ ഈ ചടങ്ങിൽ പങ്കെടുക്കുമെന്നാണ് കണക്കുകൂട്ടൽ. അതേസമയം, കടുത്ത സുരക്ഷാ ഭീഷണിയുള്ളതിനാൽ ഖമനയിയുടെ മകനും പിൻഗാമിയുമായി ചർച്ച ചെയ്യപ്പെടുന്നതുമായ മുജ്തബ ഖമനയി സംസ്കാര ചടങ്ങുകളിൽ നേരിട്ട് പങ്കെടുക്കില്ലെന്നാണ് റിപ്പോർട്ടുകൾ.
Story Summary:
The official funeral ceremonies for Iran’s Supreme Leader Ayatollah Ali Khamenei, who was killed in a US-Israeli airstrike on February 28, commenced in Tehran. His body, wrapped in the national flag, was placed for public viewing at the Grand Mosalla alongside family members, including his 14-month-old granddaughter Zehra. Foreign dignitaries, including India’s Minister of State for External Affairs Pabitra Margherita and Bihar Governor Syed Ata Hasnain, attended the ceremony. The body will be taken to Najaf, Karbala, and finally buried in Mashhad on July 9, though his son Mujtaba Khamenei will skip the event due to security reasons.
