തിരുവനന്തപുരം: ബഹുനില കെട്ടിട നിർമ്മാണ രംഗത്തെ അതിനൂതന സാങ്കേതികവിസ്മയമായ ‘ഡി-വോൾ’ (D-Wall – Diaphragm Wall) ഇതാദ്യമായി കേരളത്തിലുമെത്തി (Asset Homes D Wall Technology). തിരുവനന്തപുരം നഗരഹൃദയമായ ശാസ്തമംഗലത്ത് പ്രമുഖ ബിൽഡറായ അസറ്റ് ഹോംസ് നിർമ്മിക്കുന്ന ‘അസറ്റ് വിസ്മയം’ എന്ന പ്രീമിയം പാർപ്പിട പദ്ധതിയുടെ നിർമ്മാണത്തിലാണ് ഈ ആധുനിക ജർമ്മൻ സാങ്കേതികവിദ്യ ആദ്യമായി ഉപയോഗിക്കുന്നത്. കെട്ടിടങ്ങൾ ഇടതിങ്ങിപ്പാർക്കുന്ന നഗരങ്ങളിൽ പുതിയ പ്രൊജക്ടുകൾ ഉയരുമ്പോൾ സമീപത്തുള്ള കെട്ടിടങ്ങളുടെ അടിത്തറയ്ക്ക് യാതൊരു വിധത്തിലുള്ള കേടുപാടുകളും വരാതെ സംരക്ഷിക്കുന്നതാണ് ഈ രീതി.
മൾട്ടി-ലെവൽ ബേസ്മെന്റുകളുടെ നിർമ്മാണം പൂർണ്ണമായും സുരക്ഷിതമാക്കാൻ ഡി-വോൾ സഹായിക്കുമെന്ന് അസറ്റ് ഹോംസ് സ്ഥാപകനും എംഡിയുമായ സുനിൽ കുമാർ വി. പറഞ്ഞു. “ഇടതിങ്ങിയ കെട്ടിടങ്ങളുള്ള സ്ഥലമാണ് ശാസ്തമംഗലം എന്നതിനാലാണ് ഡി-വോൾ സാങ്കേതികവിദ്യ ഉപയോഗപ്പെടുത്താൻ ഞങ്ങൾ തീരുമാനിച്ചത്. എത്ര ആഴത്തിൽ മണ്ണെടുക്കുമ്പോഴും (Excavation) ചുറ്റുപാടുമുള്ളവരുടെ സുരക്ഷ ലോകത്തിൽ ലഭ്യമായ ഏറ്റവും മികച്ച രീതിയിൽ ഉറപ്പുവരുത്തുകയാണ് ലക്ഷ്യം. ആധുനിക ആഗോള നഗരങ്ങളിലെ പുതുനിർമ്മാണങ്ങളിൽ സുരക്ഷ ഉറപ്പാക്കുന്നതിനുള്ള ‘ഗോൾഡ് സ്റ്റാൻഡേർഡ്’ ആണ് ഡി-വോൾ,” സിവിൽ എഞ്ചിനീയർ കൂടിയായ സുനിൽ കുമാർ വിശദീകരിച്ചു. ഈ സാങ്കേതികവിദ്യയ്ക്ക് ആവശ്യമായ സവിശേഷ ക്രെയിനുകളും അനുബന്ധ യന്ത്രസാമഗ്രികളും നിലവിൽ കേരളത്തിൽ ലഭ്യമല്ലാത്തതിനാൽ പൂനെയിൽ നിന്നാണ് തിരുവനന്തപുരത്ത് എത്തിച്ചിരിക്കുന്നത്.
പ്രവർത്തനം എങ്ങനെ?
സാധാരണ ഉപയോഗിക്കുന്ന സർക്കുലർ പൈലുകൾക്ക് (Circular piles) പകരം കൂടുതൽ കരുത്തുള്ള കണ്ടിന്യൂവസ് റീട്ടെയ്നിംഗ് വോളാണ് (Continuous retaining wall) അസറ്റ് വിസ്മയത്തിന് വേണ്ടി നിർമ്മിക്കുന്നത്. ഘട്ടം ഘട്ടമായി അഞ്ച് മീറ്റർ വീതം നീളവും 60 സെന്റീമീറ്റർ വീതിയുമുള്ള ബ്ലോക്കുകളായാണ് ഇതിന്റെ നിർമ്മാണം. മണ്ണ് ഉള്ളിലേക്ക് ഇടിയാതിരിക്കാൻ തുടക്കത്തിലെ ട്രെഞ്ചിംഗ് സമയത്ത് തന്നെ സവിശേഷമായ ഒരു സ്ലറി (Slurry) കുഴിയിലേക്ക് നിറയ്ക്കും. ഇത് മണ്ണിന്റെ സുസ്ഥിരത ഉറപ്പുവരുത്തുകയും സമീപത്തെ അതിർത്തികൾക്ക് ഇളക്കമോ തകർച്ചയോ ഉണ്ടാകാതിരിക്കാൻ സഹായിക്കുകയും ചെയ്യും.
പരമ്പരാഗത രീതികൾക്ക് നൽകാനാവാത്ത ഇരട്ട മികവാണ് ഡി-വോൾ ഉറപ്പുവരുത്തുന്നത്. കുഴിയെടുക്കുന്ന സമയത്ത് ഇത് മണ്ണിനെ തടുത്തുനിർത്തുന്ന ‘ഷോറിംഗ് സിസ്റ്റമായി’ (Shoring system) പ്രവർത്തിക്കും. നിർമ്മാണം പൂർത്തിയാകുമ്പോൾ ബേസ്മെന്റിന്റെ സ്ഥിരമായ ഹെവി-ഡ്യൂട്ടി റീട്ടെയ്നിംഗ് വോളായി ഇത് മാറുകയും ചെയ്യും. കുഴിയെടുക്കലിന് മുൻപ് തന്നെ ഈ മതിലിന്റെ നിർമ്മാണം പൂർത്തിയാകുന്നതിനാൽ താത്കാലിക ഷോറിംഗിന്റെ ആവശ്യം വരുന്നില്ല. ഇത് നിർമ്മാണ സമയം വൻതോതിൽ കുറയ്ക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു. കനത്ത കാലവർഷ സമയത്ത് പോലും കുഴിയെടുക്കുന്ന ഭാഗത്തിന് ചുറ്റും ശക്തമായ പ്രതിരോധം തീർക്കാനും തൊഴിലാളികൾക്ക് സുരക്ഷിതമായ തൊഴിലിടം ഉറപ്പാക്കാനും ഇത് സഹായിക്കും.
വേഗത്തിൽ വളരുന്ന നഗരങ്ങളിൽ ബേസ്മെന്റ് പാർക്കിംഗും മൾട്ടി-ലെവൽ സൗകര്യങ്ങളും അനുദിനം പ്രാധാന്യം കൈവരിക്കുന്ന പശ്ചാത്തലത്തിൽ, അസറ്റ് വിസ്മയത്തിൽ ഡി-വോൾ ഉപയോഗിക്കുന്നത് കേരളത്തിലെ റിയൽ എസ്റ്റേറ്റ്-നിർമ്മാണ മേഖലയിലെ വൻ കുതിച്ചുചാട്ടമാണെന്ന് വിദഗ്ദ്ധർ ചൂണ്ടിക്കാണിക്കുന്നു. നിർമ്മാണരംഗത്തെ സുരക്ഷയുടെയും അർബൻ എഞ്ചിനീയറിംഗിന്റെയും (Urban Engineering) ഭാവി എന്താകുമെന്നതിന്റെ വ്യക്തമായ സൂചനയാണിതെന്ന് പ്രശസ്ത സ്ട്രക്ചറൽ കൺസൾട്ടന്റ് അരുൺ നാഡിഗ് അഭിപ്രായപ്പെട്ടു.
Story Summary:
Asset Homes has introduced the advanced German ‘D-Wall’ (Diaphragm Wall) technology for the first time in Kerala for its premium residential project ‘Asset Vismayam’ in Sasthamangalam, Thiruvananthapuram. This innovative technique ensures the complete structural safety of neighboring buildings during deep basement excavations by constructing a heavy-duty continuous retaining wall using specialized machinery brought from Pune.
